5. Oqıtıw metodları hám quralları. JobaSÍ: Oqıtıw metodı, usılı hám quralı haqqında túsinik

7. Jana pedagogikalıq tehnologiyanı qollanıw
«Texnologiya» sózi basqa tillerge grek tilinen kirgen bolıp bizińshe iskusstvo, sheberlik, kásip-óner haqqında ilim degen maǵananı ańlatadı. «Texnologiya» túsinigi jaqın jıllarǵa shekem tek óndiriske baylanıslı «Óndiris tehnologiyası» dep qollanılıp kelindi. Óndiris protsesslerin ótkeriwdiń ádisleri menen quralları haqqındaǵı bilimler jıyındısı óndiris texnologiyası dep ataladı.
Pedagogikaǵa «pedagogikalq tehnika» hám «pedagogikalıq texnologiya» túsinikleriniń kirgenine bárı 25-30 jılday ǵana waqıt boldı. Áwelgi waqıtları «pedagogikalıq texnika»nı oqıwshılarǵa pedagogikalıq tásir jasaytuǵın metodlar sistemasın tabıslı qollawda zárúr bolǵan eplilik hám kónlikpeler jıyındısı, al «Pedagogikalıq texnologiya»nı tálim-tárbiya islerin ótkeriwde qollanılatuǵın usıllar, metodlar hám qurallar jıyındısı dep túsinildi. Sonnan beri «pedagogikalıq texnologiya» túsiniginiń mánisi keńeydi, mazmunı bayıdı hám qatar quramlı bólimleri qáliplesti.
Házirgi waqıtta oqıwshını, qánigeni adamzat jámiyeti tárepinen toplanılǵan bilim, tájiriybe menen qurallandırıw hám olardı óziniń keleshektegi xızmetinde qollawǵa úyretiwdi maqset etetuǵın kognitivlik pedagogikalıq texnologiya. Lektsiya, seminar, laboratoriyalıq hám ámeliy sabaqlardı mashqalalı xarakterde, mashqalalı bayan etiw, izlep taptırıw hám izertlew metodların qollanıw arqalı oqıtıwdı kózde tutatuǵın Evristikalıq pedagogikalıq texnologiya, dóretiwshilik oylaw menen dóretiwshilik uqıplılıq, óz betinshe erkin pikirlewdi rawajlandırıw hám qáliplestiriwge qaratılǵan kreativlik pedagogikalıq texnologiya. Oqıw-biliw hám oqıw-dóretiwshilik xızmet negizinde qurilǵan integrallıq pedagogikalıq tehnologiya.
Usı joqarıda aytılǵanlarǵa negizlenip, dúńya bilimlendiriw standartı talaplarına muwapıq dúzilgen, mámleketlik bilimlendiriw standartına sayma-say bilim beriwdi hám bilim alıwdı, ulıwma insanıy hám milliy pazıyletler ruwxında tárbiyalawdı hám tárbiyalanıwdı támiyinleytuǵın, bir-biri menen baylanıslı, birgelikte háreket etetuǵın sistemalar jıyındısın pedagogikalıq texnologiya dep ataymız.
Muǵallimniń oqıwshılar menen birgelikte oqıtıw jumıslarınıń aldın-ala jobalastırılǵan maqsetin iske asırıw ushın oqıtıw protsessin shólkemlestiriw túrlerin, usılların, quralların, metodların qollap hám sabaq barısın bir qálipte izbe-iz basqarıp aqırǵı nátiyjege erisiw sistemasın oqıtıw tehnologiyası dep ataymız. Ol bir-biri menen tıǵız baylanısqan tórt quramlı bólimnen turadı: 1. Sabaqtı jobalastırıw. 2. Jobanı tolıǵı menen orınlap kútilgen aqırǵı nátiyjege erisiw. 3. Oqıwshınıń bilimin, eplilik, kónlikpelerin reyting tekseriw hám bahalaw. 4. Sabaqtı juwmaqlaw, zárúrligine qaray oqıwshılarǵa úy tapsırmasın beriw.