5-мавзу: ялпи талаб ва ялпи таклиф модели дарс мақсади

5-МАВЗУ: ЯЛПИ ТАЛАБ ВА ЯЛПИ ТАКЛИФ МОДЕЛИ
Дарс мақсади: Ялпи талаб ва ялпи таклиф модели ва унинг мохиятини талабаларга тушунтириб бериш.


Мавзу юзасидан таянч сўз ва иборалар: Агрегатлаш, AD ва AS моделлари, фоиз ставкаси самараси, бойлик ва касса қолдиғи самараси, импорт харид самараси, AD ва AS эгри чизиқлари, AD ва AS га таъсир этувчи бахоли ва бахосиз омиллар ва уларни аниқлаш, макроиқтисодий мувозанат тушунчаси, AD ва AS ни ўзгаришини реал ЯММ ва бахога таъсири, AS ни оралиқ кесими, AS ни классик кесими, AS ни Кейнс кесими, жами талаб ва таклиф ва бошқалар.
Асосий саволлар:

1. 
   АD-АS модели хақида тушунча.
   

2. АD эгри чизиғи ва унга таъсир этувчи омиллар.
3. АS эгри чизиғи ва унга таъсир этувчи омиллар.
4. АD-АS моделида нархлар ва миллий ишлаб чиқариш реал хажмининг мувозанатли даражалари.
1. АD-АS модели хақида тушунча
Бир хил турдаги товарларга бўлган талаб ва таклиф модели товар ва хизматларни ишлаб чиқариш ва уларнинг нархлари ўртасидаги фарқларни тушуниш имконини беради. Шунингдек, ишлаб чиқарилган бирор махсулотнинг барқарор нархлари ва хажми турли йилларда турлича бўлишини тушунишга имкон яратади. Аммо бир хил турдаги товарларга бўлган талаб ва таклиф модели бир нечта зарурий иқтисодий муаммолар хақидаги саволларга, чунончи, нима учун нархлар ошади ва камаяди; нима учун нархлар даражаси айрим даврларда ўзгаришсиз қолади ва бошқа даврларда зудлик билан ўсади; нима учун айрим вақтларда миллий ишлаб чиқаришнинг реал хажми камаяди ёки кўпаяди ва шунингдек, бошқа саволларга жавоб бермайди. Бу саволларга жавоб бериш учун мамлакатдаги барча бозорларни умумий холда ўрганишимиз керак. Аник айтганда, минглаб алохида нархларни бирлаштириб, йиғилган бахолар бирлигига ёки бахолар даражасига олиб келишимиз лозим. Турли хилдаги товар ва хизматлар нархларининг умумий бахо даражасини бирлаштириш, шунингдек, турли товар ва хизматларни миллий ишлаб чиқаришнинг реал хажмига бирлаштириш - агрегатлаш (ёки йириклаштириш) деб аталади.