4-мавзу ҳУҚУҚшуноснинг шахсий ривожланиш режаси мавзунинг асосий масалалари

4-МАВЗУ

ҲУҚУҚШУНОСНИНГ ШАХСИЙ РИВОЖЛАНИШ РЕЖАСИ

Мавзунинг асосий масалалари

1. Шахсий ривожланишни режалаштириш мақсади ва моҳияти. SWOT ва PEST таҳлиллари.

2. Юрист карьераси билан боғлиқ мақсадларни аниқлашгтириш.
3. Шахсий ривожланиш режасини тузиш.
4. Ҳуқуқшуноснинг ҳаракатлар тактикаси ва стратегияси.
Зарурий адабиётлар:
Mualliflar jamoasi. Shaxsiy rivojlanish. Darslik. –Т.: ТДЮУ, 2019. 42-65 b.
Сатторов Ш. Биз ғалаба қозонамиз. Муваффақият ва муносиб ҳаёт сирлари, –Т.: «Билим ва интеллектуал салоҳият», 2018. 22-35 б.

Melcher M.F. (2007). The Creative Lawyer: A Practical Guide to Authentic Professional Satisfaction. American Bar Association, USA. 221-249 p.

1. Шахсий ривожланишни режалаштириш мақсади ва моҳияти.
SWOT ва PEST таҳлиллари.


Сиз ўз ҳаётингизни, келажагингизни, карьерангизни тўлиқ назорат қиласизми? Келажакда нима қилишни хоҳлаётганингизни аниқ ва равшан биласизми? Сиз орзуингиздаги карьера поғоналарини забт этиш учун фаол қадамлар қўймоқдамисиз?
Агар сизнинг жавобингиз “йўқ” бўлса, сизда келажак ҳаётингиздан мамнун бўлмаслик хавфи мавжуд. Агар сиз карьерангизни ҳал қилишни бошқаларга (университетингизга, ишхонангизга, хўжайинингизга, ҳамкасбингизга ёки ҳатто ота-онангизга) топширсангиз, сиз истаган манзилингизга етолмайсиз ҳамда мақсад қилган орузларингизга эришолмай қолишингиз мумкин. Ахир, ўз орзуларингизни рўёбга чиқариш учун қаттиқ ҳаракат қилмасангиз, эҳтимолки, бегоналар ўз мақсадларига эришишлари учун сиз ишлайсиз.
Сиз ташаббус кўрсатишингиз, масъулиятни ўз зиммангизга олишингиз ва бўлажак карьерангизга нисбатан муносабатингизни ўзгартиришингиз лозим. Фақат ўзингизни бошқариш орқали тушунишингиз мумкинки, шахсий ёки профессионал соҳада истаган нарсага эришишнинг ягона йўли – сиз қаерга боришни хоҳлашингиз устида ўйлаб, у ерга бориш режасини тузиш ва мақсадларингизга эришиш йўлида мунтазам ҳаракатланишингиз лозим.
Шахсий ривожланишни режалаштириш – юқоридаги ишларни амалга оширишнинг тизимли усулидир. Бунда сиз:

• 
  биринчидан, ўзингизни англайсиз ва мазмунли мақсадлар қўясиз.
  
• 
  иккинчидан, ушбу мақсадларга эришиш учун зарур қадамларни ташлашни режалаштирасиз.
  
• 
  учинчидан, билим, малака, кўникма ва тажрибангиздаги камчиликларни аниқлайсиз ва уларни бартараф этиш учун ҳаракатлар режаси тузасиз.
  

Шахсий ривожланишни режалаштириш – карьерангиз учун узоқ муддатли мақсадлар қўйиш ва уларни қандай амалга ошириш ҳақида мушоҳада қилишингиздир. Лекин узоқ муддатли истиқболда нима қилишни хоҳлашингизни билишдан олдин сиз ҳозирги ҳолатингиз тўғрисида фикрлашингиз зарур. Сизнинг устунлигингиз нимада? Қайси жиҳатларингизни ривожлантиришингиз зарур? Сизда қандай имкониятлар бор? Сизнинг мақсадларингизга таъсир қилувчи сизга боғлиқ бўлмаган омиллар ҳам борми?

Ушбу саволларга жавоб бериш учун бизнесда қўлланиладиган классик воситалар – SWОТ ва PESТ таҳлилларни сизнинг шахсий вазиятингизга мослаштирамиз. Улардан фойдаланиб, сиз ҳозир қаерда ва қандай вазиятда эканлигингиз тўғрисида аниқ тасаввурга эга бўлишингиз ва қай томонга ҳаракатланиш тўғрисида қарор қабул қилишингиз мумкин.