4-мавзу ҳУҚУҚшуноснинг шахсий ривожланиш режаси мавзунинг асосий масалалари

Шахсий SWОТ таҳлил

Б изнесда SWОТ компаниянинг кучли ва заиф томонларини (Strengths and Weakness) очиб беради ҳамда мавжуд имконият ва хатарларни (Opportunities and Threats) аниқлайди.

Бу компания учун қай даражада зарур бўлса, уни ўз ҳолатингизга қўллаганингизда сиз учун ҳам шу қадар фойдали бўлади. Ўзингизнинг кучли томонларингизни билиб сиз қўлингиздан нималар келишига, қайси соҳаларда бошқалардан ажралиб туришингизга урғу беришингиз мумкин. Заиф томонларни билиш эса қайси жиҳатларингизни ривожлантириш устида ишлашингиз зарурлиги ва қай жабҳаларда ёрдамга муҳтож эканлигингизни англашингизга кўмаклашади.
Кучли томонларингиз ва имкониятларингиз биргаликда узоқ муддатли истиқболли карьерангизни аниқлаштиришга ёрдам беради. Мавжуд заиф томонларингиз ва содир бўлиши мумкин бўлган эҳтимолли хатарлар – ўз мақсадларингизга эришиш йўлида айнан улар устида ишлашингиз шарт бўлган жиҳатларни ўзида акс эттиради.
SWОТ таҳлилни амалга ошириш учун жорий ҳолатингиз ва вазиятингиз тўғрисида ўзингизга қатор саволларни беришингиз ва тўрт катакдан ташкил топган қуйидаги жадвални тўлдиришингиз керак. Ушбу катаклар тўғрисида кейинги саҳифаларда батафсил маълумот берилади.

КУЧЛИ ТОМОНЛАР (STRENGTHS)	ЗАИФ ТОМОНЛАР (WEAKNESSES)
ИМКОНИЯТЛАР (OPPORTUNITIES)	ХАВФЛАР (THREATS)

Кучли томонлар. Бу ерда сизнинг вазифангиз – сизни бошқалардан ажратиб турадиган сифатларингизни аниқлашдан иборат. Сизда бошқалар орзу қиладиган қандай хусусиятлар мавжуд?
Кучли томонларингиз ҳақида ўйлаётганингизда профессионал кўникмалар билан чекланиб қолманг. Бутун тажрибангизни таҳлил қилинг: ўсиш ва ривожланиш учун сизда мавжуд имкониятларни кўздан қочирманг. Масалан, сизнинг билим даражангиз, сиз олган таълим, истеъдод ва қобилаятларингиз, шахсиятингизга боғлиқ омиллар, қизиқишларингиз ва ҳоказо.
Ўзингиздан қуйидаги саволларни сўранг:

• 
  Сиз қайси соҳаларда ростдан ҳам зўрсиз?
  
• 
  Сизнинг қайси малака ва кўникмаларингизни бошқалар ҳам сезишади ва улар учун ҳақ тўлашлари мумкин?
  
• 
  Ўзингиз бирга ишлайдиган ёки ўқийдиган одамларга қараганда нималарни яхшироқ бажарасиз?
  
• 
  Энг кўп нимангиз билан фахрланасиз?
  
• 
  Бошқаларда йўқ қайси тажриба, ресурс ёки алоқаларга эгасиз?
  

Дўстларингиз ва яқинларингиздан сизда қандай кучли томонлар борлиги тўғрисида фикрларини сўрашни ҳам унутманг. Бу кўплаб ғоялар тўплашнинг энг мақбул усули ҳисобланади. Чунки биз кўп ҳолатларда ўзимизга нисбатан паст баҳо берамиз ва ўз қобилиятларимизни кўрмаслигимиз мумкин. Бошқалар сиз ҳақингизда ажойиб фикрларни билдиришса, ўзингизга бўлган ишончингиз янада ортади.