3-mavzu. Mol qoni tavsifi, ishlov berish texnologiyasi va ishlatilishi Reja

3.3.1. Qon va uning komponentlarini konservalash
Mirkobiologik jarayonlarning rivojlanishini oldini olish uchun defibrinlangan yoki stabillashtirilgan qonni, zardobni, plazma va boshqa elementlarni olgandan keyin darrov ishlov berishga yuboriladi. Defibrinlangan va stabillashtirilgan qonni yig‘gandan keyin 15 ⁰S li haroratda 4 soatgacha saqlash mumkin, zardob, plazma va tarkibiy elementlarni saqlash muddati 2 soatgacha. Qon yoki zardob tarkibiga 10% li natriy xloridning to‘yingan eritmasini qo‘shib saqlash muddatini uzaytirish mumkin. Bunday holatda ularni 4˚S dan yuqori bo‘lmagan haroratda 2 sutka davomida saqlash mumkin.
Konservant sifatida ammiak, uglerod dioksidi, natriy sitratning benzoy kislotasi va natriy xlorid bilan aralashmasi, natriy pirosulfit, sut kislotasi va boshqa moddalar ishlatiladi. Texnik mahsulotlar tayyorlash uchun ishlatiladigan qonni quyidagi antiseptiklar bilan konservalash mumkin: krezol yoki fenol-2,5 kg 1 tonna qonga, ammiak 20% miqdorda va boshqa kimyoviy moddalar. Oziqaviy maqsadda ishlatiladigan qon va uning fraksiyalarini sovitish asosida konservalanadi. Sovitilgan qonning saqlash muddati juda chegaralangan: plazmani 0-2⁰S da 4-5 sutka, 4˚S da - 8 soat.
Qon va uning komponentlarini uzoq muddat saqlash uchun muzlatish kerak. Idishlarga joylashtirilgan qon, plazma va zardobni muzlatish kameralari va muzlatish apparatlarida muzlatish mumkin. Muzlatish uchun tangachasimon muz tayyorlaydigan muzlatuvchi baraban qurilmalarni ishlatish maqsadga muvofiq. Bunday holatda go‘sht mahsulotlari ishlab chiqarishda, qon yoki uning fraksiyalarini ishlatishda ularni muzdan tushirishga hojat qolmaydi. Qonni saqlash muddati - 10˚S da 6 oy. Qonni muzdan tushirish gemoliz bilan o‘tadi.
Hozirgi vaqtda qonni yopiq holatda yig‘ish, stabillashtirish, separatsiyalash, sovitish va kimyoviy reagentlar yordamida konservalash uchun maxsus qurilmalar ishlab chiqarilgan. Ularni qo‘llash ishlab chiqarish unumdorligini oshiradi, sanitariya holatini yaxshilaydi, jarayonni masofadan turib nazorat qilish va yo‘naltirish imkoniyatini yaratadi.