2-Мавзу. Жисмоний тайёргарлик мазмуни ва моҳияти жисмоний сифатлар қандай хусусият хисобланади

27- машқ. Сузиш.
а) эркин услубда 100 метрга сузиш
Эркин услубда сузиш учун старт олиш супаси устида туриб старт олинади.
Дастлабки «Жойлар эгаллансин» командаси берилгач, ҳарбий хизматчилар старт олиш супасининг устига чиқиб, ортки четига яқин нуқтасига туради. «Стартга» командаси берилгач, оёқ кафтлари орасидаги масофа 15-20 сантиметрга очилиб, бармоқлари билан супанинг олд қирраси сиқиб олинади. Тизза букилиб, гавда олдинга энгаштирилган ҳолатда қўллар орқага тортилади. «ОЛҒА» командаси берилганида қўллар олдинга силтанади, оёқлар билан супага итарилганча олдинга баланд сакралади, тана ҳавода тўғри тутиб олиниб, қўллар олдинга узатилади. Сузиш жараёнидаги ортга қайтиш амали тананинг ҳар қандай қисми билан бассейн деворига мажбурий тегилган тарзда бажарилади;
б) ҳарбий кийимда қурол макети билан сузиш
Ушбу машқ ботинка ечилиб, бел камарига капакиси юқорига қаратилиб олд ёки орқа томонга боғлаб, автомат макети орқага осиб олинган дастлабки ҳолатдан, старт олиш супаси устида туриб бажарилади.
Машқ раҳбарининг командасига кўра сувга сакраб тушилиб, дистанция ҳар қандай услубда сузиб ўтилади. Қурол ёки анжом-аслаҳа буюми йўқотилса, машқ бажарилмаган, деб эътироф этилади.
28- машқ. Қўл жанги амалларининг бошланғич комплекси (1- сонли қўл жанги комплекси (1-ҚЖ)).
1-ҚЖ ўз ичига қурол билан ва қуролсиз бажариладиган амалларни мужассам этади.
Қурол билан бажариладиган амаллар:
жойда туриб найза санчиш. Жангга шай ҳолатда турганча, қўл олдинга тез узатилиб, автоматнинг найза-пичоғи нишонга ўқталганча, қўлнинг кескин ва тез ҳаракати билан рақибга жароҳат етказилади. Шундан сўнг, найза нишондан суғуриб чиқарилиб, жойда турганча, жангга шай ҳолат қабул қилинади ёки амал ижроси давом эттирилади (8- расм);




8- расм. Олдинга ташланмай найза санчиш (ствол учи билан зарба бериш)


олдинга ташланиб найза санчиш. Жангга шай ҳолатда турганча, автоматнинг найза-пичоғини нишонга ўқташ баробарида, ўнг оёқ билан ердан итарилиб, чап оёқ олдинга ташланади ва айни фурсатда қўлнинг кескин ва тез ҳаракати билан душманга шикаст етказилади. Шундан сўнг, найза нишондан суғуриб чиқарилиб, чап оёқ билан ердан итарилганча, жойда туриб, жангга шай ҳолат қабул қилинади ёки амал ижроси давом эттирилади (9- расм);