14-мавзу. Гастрономия туризмини ривожлантириш истиқболлари

14.3. Ўзбекистонда гастрономик туризмнинг ривожланиши


Пазандачиликда ҳар бир халқнинг урф-одатлари, тарихий анъаналари ва ўзига хос хусусиятлари акс этади. Мана шу ўзига хослик миллий ошхоналарда ажойиб таомларнинг юзага келиши ва турли-туман бўлишига ҳам сабаб бўлади. Барча таомларимизнинг маззали ва хуштаъмлилик даражасига кўтарилишида қуёшли ўлкамиз заминида етиштириладиган дехқончилик маҳсулотларининг хилма-хиллиги муҳим аҳамият касб этади. Дастурхонимизнинг ўзига хос хусусиятларини тўла намоён этадиган омиллардан бири – таомларимизнинг турли-туманлигидир. Чунончи, чорвачилик билангина шуғулланадиган жойларда гўшт-ёғ, сут-қатиқ кўпроқ истеъмол қилинса, дехқончилик ривожланган худудларда эса сабзавотли, дон-дуккакли овқатлар асосий ўрин олади. Шундай таомлар борки, буларни кундалик истеъмол учун эмас, балки байрам дастурхонларига мўлжаллаб, азиз меҳмонлар учун тайёрланади. Қази-қарта, пўстдумба ўрамаси, тандир кабоб, норин, хасип каби тансиқ таомлар шулар жумласига киради.
Бир худудда яшаётган турли миллатлар ва элатларнинг таомлари бир-бирига ўхшаши табиий ҳолдир. Масалан, агар ўзбек таомномасига назар ташлайдиган бўлсак, унда рус, тожик, украин, кавказ, татар, қозоқ, уйғур ва бошқа халқлар таомларининг ўнлаб хиллари уйғунлашиб, тобора такомиллашиб бораётганлигининг гувоҳи бўламиз. Ўз навбатида, паловларимиз, суюқ ошларимиз, ҳамир таомларимиз қардош халқларнинг дастурхонини ҳам безаб турибди.


Халқимиз пазандачилигида йилнинг маълум фаслларидагина дастурхонга тортиладиган таомлар ҳам бор. Масалан, баҳорда қаймоқ қўшилган редискали газак, шовул шўрва, сумалак, ҳалим, кўк чучвара, кўк сомса, коваток палов (ток оши), қовурма гулкарам, ялпизли мошхўрда истеъмол қилинади. Ёзда эса помидор кабоб, карам дўлма, думбил шўрва, қалампир дўлма, лағмон, қатиқли угра оши, сузмали газак, чалоп, гўжа оши, буғлама кабоб, гўштли димлама, сабзавотли димламалар, айрон, яхна чой, мева компотлари ва ҳоказолар хуш келади. Кузда қовурма балиқ, лаққа кабоб, барра гўшт, калла шўрва, бедана кабоб, беҳили палов, картошкали манти, асалли беҳи, кесма лағмон, ошқовоқ сомса кабилар кўпроқ дастурхонлардан аримайди. Аёзли кунларда қази-қарта, пўстдумба, қўй ёғли палов, карт думба палов, қазили палов, барра кабоб, турпли салат, қовурма шўрва, мошкичири, қишга сақланадиган мевалар, уларнинг мураббо, компот, қоқилари, сиркаланган ва тузланган сабзавотлар истеъмол қилинади.
Ўзбекистон шароитида гастрономия туризмини шакллантиришдаги миллий таомларнинг турлари қуйидаги 14.1-жадвалда берилган.


14.1-жадвал