1. Yuqori siydik chiqarish yo‘llarining tug‘ma nuqsonlari

Klinikasi va tashxisi. Ikkilangan buyrakka xos bo‘lgan klinik simptomlar ilk bosqichlarda ro‘y-rost namoyon bo‘lavermaydi. Maktab yoshidagi bolalar hech sababsiz tana haroratining ko‘tarilishi (subfebril), keyinchalik esa bel sohasida simmilovchi og‘riq bo‘layotganidan shikoyat qilishlari mumkin. Ayrim hollarda esa ularni biqin sohasida sanchiqli og‘riq ham bezovta qilib turadi. Ikkilangan buyrakning gipoplaziv segmenti surunkali pielonefritga uchragan hollarda uning o‘tkirlashuvida dizuriya, leykosituriya, ba’zan mikro- yoki makrogematuriya kuzatiladi. Proteinuriya bo‘lishi ham ehtimoldan holi emas.
Buyrak ikkilanishini UTT orqali aniqlash mumkin. O‘z navbatida, ultratovush tasvirda quyidagilar aniqlanadi: buyrakning ko‘ndalang kesimida buyrak o‘rta qismida sinuslarini bir-biridan ajratib turuvchi parenxima aniqlanadi, bundan tashqari, yuqori segment o‘lchami pastki segmentdan, taxminan ikki barobar kichik bo‘ladi (17.2-rasm).

17.2- rasm. Buyraklar ikkilanishining exografik tasviri.

Kasallikka tashxis qo‘yish uchun ekskretor va infuzion urografiyadan keng qo‘llaniladi (17.3-rasm). Bu tekshirish yordamida rentgen tasvirda buyraklarning to‘liq yoki noto‘liq ikkilanganligini aniqlash mumkin. Siydikning solishtirma og‘irligi kam bo‘lgan holatlarda infuzion urografiyadan qo‘llaniladi. Yanada aniq tashxis qo‘yish uchun diagnostik sistoureteroskopiya qilish lozim. Bu tekshirish usuli orqali siydik naylari teshiklari topiladi va ureteral stent qo‘yib tekshirishni retrograd ureterografiya bilan to‘ldirish mumkin.

17.3-rasm. Retrograd pielogramma. Ikki tomonlama buyraklar to‘liq ikkilanishi.