1. Машқда қийналсанг жангда осон бўлади. Илм олиш ҳар бир муслим ва муслима учун фарздир. (Ҳадис)

Кимёвий реакцияларнинг ташқи аломатлари – реакция борганлигини кўрсатувчи белгилар.
1) Ранг ўзгариши; 2) Газ модда ажралиши; 3) Чўкма тушиши; 4) Кўп миқдорда иссиқлик ажралиши ва ҳ.к. Демак, юқорида саналган ҳолатларнинг камида биттаси кузатилса реакция содир бўлганини билдиради.
Кимёвий реакцияларнинг классификацияси


Кимёвий реакцияларни энергиясига қараб 2 турга ажратамиз.

1. 
   Экзотермик реакциялар – иссиқлик ажралиши билан борадиган реакциялар. Экзотермик сўзи грекчадан олинган бўлиб, “экзо” ташқарига, “термос” иссиқлик деган маънони англатади. Экзотермик реакциялар тенгламалари қуйидаги тартибда ёзилади. А + В = C + Q ёки (- H). + Q ёки (- H) иссиқлик ажралишини билдиради.
   
2. 
   Эндотермик реакциялар – иссиқлик ютилиши билан борадиган реакциялар. Эндотермик сўзи грекчадан олинган бўлиб, “эндо” ичкарига, “термос” иссиқлик деган маънони англатади. Эндотермик реакциялар тенгламалари қуйидаги тартибда ёзилади. А + В = C – Q ёки (+ H). – Q ёки (+ H) иссиқлик ютилишини билдиради.
   

Ажраладиган ёки ютиладиган иссиқлик миқдори кўрсатилган реакция тенгламалари термокимёвий реакция тенгламалари дейилади. Кимёвий реакция натижасида ажралган ёки ютилган иссиқлик миқдори реакциянинг иссиқлик эффекти дейилади. Реакциянинг иссиқлик эффекти икки хил усулда ҳисобланади.

1) Реакцияда қатнашаётган моддаларнинг ҳосил бўлиш иссиқликларидан фойдаланиб;

2) Реакцияда қатнашаётган моддаларнинг ёниш иссиқликларидан фойдаланиб.

Ҳосил бўлиш иссиқлиги – оддий шароитда (25^оС ёки 298 К) 1 мол модданинг оддий моддалардан ҳосил бўлганда ажралган ёки ютилган иссиқлик миқдори. Оддий моддаларнинг ҳосил бўлиш иссиқлиги 0 (нол)га тенг. Масалан: S – олтингугурт, O₂ – кислород, Fe – темир ва ҳ.к.
Ёниш иссиқлиги – оддий шароитда (25^оС ёки 298 К) 1 мол модданинг ёнишидан ажралган иссиқлик миқдори. Моддаларнинг энг юқори валентли бирикмалари ёниш иссиқлиги 0 (нол)га тенг. Масалан: CO₂ – карбонат ангидрид, SO₃ – сулфат ангидрид, CaCO₃ – оҳактош, H₂O – сув, P₂O₅ – фосфор (V) оксиди, MgO – магний оксиди ва ҳ.к.