1-боб. “Қишлоқ ХЎжалиги иқтисодиёти”фанининг предмети, Ўрганиш услублари, мақсад ва вазифалари

4. Қишлоқ хўжалигида ишлаб чиқариш мавсумий характерга эга. Бунда 
айниқса, кузги ғалла етиштиришда ишлаб чиқариш даври билан иш вақти 
ўртасидаги сезиларли фарқни кўриш мумкин. Кузги ғаллани тайёрлаш ва 
экиш даври август, сентябр ойларидан бошланиб, ҳосил келаси йилнинг июл 
ойида йиғиштириб олинади. Ушбу давр оралиғида иш вақтида бир неча 
марта узилишлар бўлади: экин майдонларини тайёрлаш, экиш, экинлар 
парвариши, ҳосилни йиғиштириб олиш ва бошқалар. Ишлаб чиқариш даври 
эса экинларнинг табиий ўсиши ва ривожланиши сабабли узлуксиз бўлади. 
Мавсумийлик ишлаб чиқаришни ташкил этишга, меҳнат ресурслари ва 
техникадан фойдаланишга сезиларли таъсир кўрсатади. 
Шунингдек, қишлоқ хўжалигининг мавсумийлик характери қайта 
ишлаш саноатида ҳам акс этади. Чунки қишлоқ хўжалиги хом-ашёси йил 
давомида нотекис тақсимланади. 
5. Қишлоқ хўжалигида ишлаб чиқарилган маҳсулот кейинчалик ишлаб 
чиқариш жараёнида ишлаб чиқариш воситаси (уруғлик, ем, органик 
ўғитлар, ёш чорва моллари ва бошқалар) сифатида ишлатилади.Саноатда 
эса хом-ашё бошқа тармоқ корхоналаридан келтирилади. Ишлаб чиқариш 
технологияси ушбу хусусият билан боғлиқ бўлиб, қишлоқ хўжалигида 
технологик жараён биологик омиллар ва тирик организмларга таянса, саноат 
кимёвий, физик ва механик жараёнларга таянади. 
6. Тармоқ юқори фонд сиғимига эга бўлиб, айланма капитал секин 
айланади, инвесторлар учун ушбу ҳолат унчалик жозибали бўлмаганлиги 
сабабли бу тармоқни ривожлантиришда давлатнинг роли кучаяди. 
7. Маълумки, қишлоқ хўжалигитехникалари (тракторлар, машиналар, 
комбайнлар ва бошқа қишлоқ хўжалиги техникалари) бир жойдан 
иккинчи жойга кўчиб юради,меҳнат предметлари (ўсимликлар) эса бир 
жойда жойлашган. Саноатда аксинча, меҳнат предметлари (хом-ашё) кўчиб 
юрса, асбоб-ускуна, машина ва станоклар бир жойга ўрнатилган.