2- мавзу: Керамик материаллар ва буюмлар (кмб). Гилтупроқ таркиби, хоссалари. Гилтупроқни куйдиришда физик-кимёвий жараёнлар. Керамик буюмлар ишлаб чиқариш технологияси, турлари, хоссалари, ишлатилиши. Режа

2- Мавзу: Керамик материаллар ва буюмлар (КМБ). Гилтупроқ таркиби,
хоссалари. Гилтупроқни куйдиришда физик-кимёвий жараёнлар.
Керамик буюмлар ишлаб чиқариш технологияси, турлари,
хоссалари, ишлатилиши.
Режа:

1. 
   Керамик материалларни ишлаб чиқариш технологияси.
   
2. 
   Керамик буюмлар структураси ва умумий хоссалари.
   
3. 
   Деворбоп керамик буюмлар.
   
4. 
   Қоплама керамик буюмлар.
   
5. 
   Махсус керамик материаллар ва буюмлар.
   

Таянч иборалар: гилтупроқ, алюмосиликатлар, қуритиш, куйдириш, микрокомпозит, макрокомпозит, сувга чидамлилик, модификатор, деворбоп керамика, безак керамикаси, техник керамика.

1. 
   Керамик материалларни ишлаб чиқариш технологияси
   

Керамик буюмлар хоссалари шакли, хом ашё тури ва технологиясидан қатъий назар уларни ишлаб чиқариш қуйидаги асосий жараёнлардан иборат: хомашёни қазиб олиш, хомашё массасини тайёрлаш, буюмни қолиплаш, уларни қуритиш ва пишириш.
Гилни хом ашё кареридан экскаваторлар ёрдамида очиқ усулда қазиб олинади ва темир йўл, автомобил ёки бошқа транспортда керамик буюмлар заводига ташилади. Хом ашёни қазиб олишда карер гил захираси, қалинлиги, жойлашиш характери аниқланади ва 1-2 йил аввал юзаси ўсимликлар, кераксиз жинслардан тозаланади.
Хом ашё массасини тайёрлаш. Табиий ҳолдаги қазиб олинган гил керамик буюмлар ишлаб чиқариш учун яроқсиз бўлади. Буюм тайёрлаш учун гилнинг табиий тузилишини бузиш, ундан зарарли аралашмаларни чиқазиб ташлаш, йирик аралашмаларни кукунлаш, гилни кукунлаш ва қўшимчалар қўшиш, барча компонентларни қуйма масса ҳосил бўлгунча махсус машиналарда (гилни эзғиловчи тегирмон, парракли аралаштиргич ва ш.к.) аралаштирилади. Хом ашё массаси буюм тури, хом ашё тури ва хоссасига кўра пластик, ярим қуруқ, бикр, қуруқ, ва ҳўл (шликер) усулларда тайёрланади. Пластик усулда хом ашё компонентлари табиий намликда ёки қуритилган бўлса, 18-28% намликкача сув аралаштириб тайёрланади. Пластик усулда олинган хом ашё массасидан ғишт, керамик тош, черепица, қувур ва бошқа буюмлар тайёрланади.
Бикр усулда қолиплаш пластик усулнинг ривожлантирилган замонавий усули бўлиб, хом ашё массаси намлиги 13-18% бўлади. Буюм вакуум ёки гидравлик пресслар воситасида 10-20 МПа босимда қолипланади. Бу усулда буюмни қуритишга энергия сарфи камаяди, юқори мустаҳкамликдаги хом қолипланган буюм тайёрланади.
Ярим қуруқ усулда хом ашё компонентлари қуритилади, бўлакланади, майдаланади ва яхшилаб аралаштирилади. Бу усулда керамик буюмлар 8-12% намликдаги хом ашё массасини 15-40 МПа босимда пресслаб тайёрланади. Бунда буюм ишлаб чиқариш цикли икки марта қисқаради, буюм аниқ ўлчамларда ва қирралари тўғри ҳолда қолипланади ва ёқилғи 30% тежалади.