Ўзбекистоннинг энг янги тарихи

4. Юксак интеллектуал салоҳиятли, маънавий баркамол авлодни тарбиялаш, комил инсонни вояга етказишда “Ўзбекистоннинг энг янги тарихи” фанининг тутган ўрни. Биз комил инсон тарбиясини давлат сиёсатининг устувор соҳаси деб эълон қилган эканмиз, ақл-заковатли, юксак маънавиятли кишиларни тарбиялай олсаккина олдимизга қўйган мақсадларга эриша оламиз, юртимизда фаровонлик ва тараққиёт қарор топади. Зеро, “Мозий – истиқболнинг тарозусидир” – деб ёзган эди М. Беҳбудий. Унинг “Тарих ва жуғрофия” асарида “Халқ тарихи, мамлакат тарихи, ислом тарихини билмай туриб оддий мусулмон, давлат арбоби, руҳоний, олимнинг ҳам бўлиши мумкин эмас. Тарих ҳамма нарсани – давлатнинг гуллаб-яшнаши ва инқирозининг сабабларини, одамлар эътиқодининг ҳолатини, мусулмончиликнинг таназзулини, ислом илоҳий пойдеворининг бузилишини тушунтиради. Комил ва адолатли инсон бўлиш учун, албатта, тарихни билиш керак, бирорта билим тарих илмисиз комил бўлмайди»,- деб таъкидланган.
Ҳар томонлама етук, комил инсонни тарбиялаш ва шакллантиришда “Ўзбекистоннинг энг янги тарихи” фани олдида қуйидаги долзарб вазифалар туради, хусусан:
биринчидан, ёш авлод онгида ғоявий-сиёсий, назарий-илмий дунёқарашни шакллантириши лозим, воқеа ва ҳодисаларга тарихий нуқтаи назардан ёндашадиган ҳар томонлама етук, баркамол инсонни тарбиялаши керак;
иккинчидан, мустақил Ўзбекистон ёшлари онгида миллий виждоннинг шаклланишига кўмаклашиши лозим. Ким бўлишидан қатъий назар, жамиятнинг ҳар бир аъзоси ўз ўтмишини яхши билса, бундай одамларни йўлдан уриш, ҳар хил ақидалар таъсирига олиш мумкин эмас. Тарих сабоқлари инсонни ҳушёрликка ўргатади, иродасини мустаҳкамлайди, уларда истиқлол тафаккури, ҳозирги ижтимоий-сиёсий, иқтисодий турмушни ўтмиш билан қиёслаш ва келажакка назар солиш малакасини шакллантиради, халқ миллий жиҳатдан уйғонади;
учинчидан, ёш авлодни улуғ халқимизнинг олийжаноб миллий қадриятлари ва ахлоқий фазилатлари: ҳалоллик, одиллик ва одамийлик, инсонпарварлик, поклик ва ростгўйлик, меҳнатсеварлик ва камтарлик, иймон ва эътиқод руҳида тарбияламоғи, Ватан ва халқ олдидаги бурчига садоқатини қарор топтирмоғи даркор;