Ўзбекистон республикаси қурилиш вазирлиги ўзбекистон республикаси

Юзага фактура бериш - маҳсулот юзасини босим остида, тирнаш ва бошқа усуллар ёрдамида безашдир.
Кислотага чидамли сопол
Кимё саноати қурилмаларини қоплаш ва кислотали агрессив муҳит таъсирида ишлайдиган қурилиш конструкцияларини ҳимоя қилиш учун мўлжалланган. Ғишт, қоплама плитка ва фасон махсулотлари ишлаб чиқарилади.
Ғиштнинг сув шимувчанлиги 6,0-10,0% дан ошмаслиги керак, кислотага чидамлилиги - 95,0-97,5%, сиқилишдаги мустаҳкамлиги - 30-55 МПа, иссиқликка бардошлилиги - 2-3 та цикл.
Кислотага чидамли плиткалар қуйидаги маркаларда ишлаб чиқарилади: КФ – фарфорли сопол; ТКД – дунитли иссиқликка бардошли, кислотага чидамли; КШ – шамотли, кислотага чидамли; ТКГ - гидролиз саноати учун кислотага чидамли; КС – кислотага чидамли қурилиш конструкциялари. Бундай плиткаларнинг хоссалари қуйидагича: кислотага чидамлилиги 96-99%, сув шимувчанлиги 0,4-4,5%, сиқилишдаги мустаҳкамлиги 40-130 МПа, эгилишдаги мустаҳкамлиги 10-30 МПа.
Оловбардош сопол
Оловбардош сопол 1000 °C дан юқори ҳароратларда ишлайдиган саноат заводларини печларини қуришда, шунингдек саноат қурилмаларининг сиртини қоплаш учун - цемент саноатининг айланма печлари, сопол ишлаб чиқариш туннеллари ва айланма печлари ва шу кабиларда ишлатилади.
Оловбардошлик даражаси қуйидаги синфларга бўлинади:
- оловбардош .............. 1580-1770 °С;
- юқори оловбардош .............. 1770-2000 °С;
- ўта юқори оловбардош ........... 2000 °С дан юқори.
Оловбардош сопол ғоваклилиги бўйича 5 та синфга бўлинади:
- ўта зич (ғоваклиги 3% дан кам);
- юқори зич (8-10%);
- зич (10-20%);
- оддий (20-30%);
- енгил (40-80%).
Хом ашё турига қараб, сопол қуйидагиларга бўлинади:
шамотли – оловбардой лойдан (каолин) тайёрланган, қўшимча сифатида шамот қўшилган, оловбардошлиги 1500 °С гача;
динасли - кварц қумига, оҳак ёки тупроқ қўшиб тайёрланган, оловбардошлиги - 1750 °С;
магнезиалли - магнезитдан (МgCО₃) тайёрланган, таркиби асосан МgО (периклаза) ташкил топган, оловбардошлиги 2000 °С дан юқори.
Шунингдек, хром, карбид, углерод, доломит, ярим нордон ва юқори гил тупроқли маҳсулотлар ишлаб чиқарилади.