Ўзбекистон республикаси “Ҳунарманд” уюшмаси ўзбекистон республикаси бандлик ва меҳнат муносабатлари вазирлиги

Гулқатори – гулларнинг тик йўлларга саф-саф тизимидан ҳосил бўладиган бир бутун нақш.
Дўппи – Ўзбекистонда кенг тарқалган енгил бош кийим. Дўппи кийиш дастлаб Эронда ва туркий халқлар ўртасида, Россияда эса XIII асрда расм бўлган.
Жингалак – бурама, ўрама шаклидаги нақш бўлакчаси.
Жойнамоз - ерга солиб устида намоз ўқийдиган тўшама. Жойнамоз каштачиликда жуда чиройли қилиб безатилган бўлади.
Занжира – узлуксиз занжирсимон боғланиб кетган нақш.
Зардевор - уй жиҳози, у сидирға шойи бахмал, сатинга кашта тикиб безатилган бадиий буюм.
Зирк гул – ислимий нақш бўлаги, чиройли япроқгул. Азалдан бу гул осойишталик ва умрбоқийлик рамзи сифатида тасвирланган.
Ислимий – ўсимликсимон шаклдаги такрорланувчи тақсимлардан тузилган асосий нақш тури. Ислимий бир-бирига узлуксиз уланиб, ўралиб кетадиган чирмовуқсимон, ўсимликсимон нақшларнинг такрорланишидан ташкил топади.
Йўрмадўзлик – каштадўзлик тури; бадиий буюмлар, кийимларга йўрма чокда гул тикиш касби.
Кандахаёл – каштадўзликда кенг тарқалган чок тури. Кандахаёл чокида тўшама ип тик ёки ётиқ бўлади.
Каштадўзлик, каштачилик – кашта тикиш касби, амалий санъатнинг қадимий соҳаларидан бири. Каштадўзликнинг деярли барча халқларда қадимийлигини, иқлим, табиий шароит, муҳит билан боғлиқ ҳолда ҳар бир халқнинг маданияти, санъати, касб-ҳунар турлари билан бирга, уларнинг таъсирида ривож топганини кўрсатади.
Кирпеч – кирпўш, токчага тахлаб қўйилган кийим-кечак устидан ёки деворни вертикал бўш жойларига илиб, уйни безатиб туриши учун ишлатиладиган бадиий буюм.
Куппа чоки - турли йўналишда, яъни чапдан ўнгга, ўнгдан чапга, юқоридан пастта, пастдан юқорига сидирқа тикиб ҳосил қилинади.
Нимсўзана – тожикча “ним” – ярим. Нурота ва Бухорода девор безаги учун ишлатиладиган безакли каштанинг аталиши. Ҳозирда сўзана, палак, нимсўзана панноси кашта буюмларини тикишда йўрма чокдан фойдаланилади.
Ньюанс – рангларнинг бир-бирига яқинлиги.
Орнамент - геометрик шакллар билан ўсимлик ёки ҳайвонлар ола-мидан олинган тасвирларни ритмик тартибда қўшиб, уйғунлаштириб ишланган бўёқда, ўйма ёки чизма нақш, безак.
Палак - деворларга илинадиган энг йирик, энг қиммат безак буюмларидан бири. Палакда осмон ва тўлин ой акс эттирилади. Уни қадимда оқ ёки малла бўзга кашта тикиб тайёрланган. У сўзанадан гулларининг йириклиги, заминига ҳам кашта қопланиши билан фарқ қилади.