Ўзбекистон республикаси “Ҳунарманд” уюшмаси ўзбекистон республикаси бандлик ва меҳнат муносабатлари вазирлиги

Ургут каштачилик мактаби. Самарқанд каштаси бошқа мактаб кашталаридан йирик гулда тикилиши, гул атрофи сергак ниҳолдан “қўчқор шохи” нақшининг тикилиши билан фарқланади. Гуллар энига ва бўйига тартиб билан жойлаштирилади. Ранглар борасида Самарқанд сўзаналарида жигарранг, пушти, сарғиш, қора ранглар етакчилик қилади ва асосан оқ матога тикилади. Самарқанд сўзанаси босма чокда мато сатҳи бўйлаб бир хилда тикилади.
Мавлуда Ҳамдамова кўҳна Самарқанд ва Ургут услуби анъаналарини қайта тиклашга муносиб ҳисса қўшган ҳунарманд. “Шуҳрат медали” соҳиби. М.Ҳамдамова Ургут туманида каштачилик соҳасини уй юмуши, аёллар эрмагидан амалий санъат ва касб даражасига олиб чиқди ва ўнлаб аёлларни доимий иш билан таъминлади. М.Ҳамдамова қадимий анъаналарни қайта тиклади. Бунинг учун Ургутнинг турли қишлоқ ва маҳалларини кезиб, каштачиликда қадим замонларда ишлатилган нақш турларини ўрганди. Бу изланишлари самарасида бадиий кашталарнинг босма, йўрма ва чиннихаёл чоклардан фойдаланиш услублари қайта ўзлаштирилди. Самарқанд ва Ургут услубининг ўзига хослигини акс эттирган қўлда тўқилган бўз, адрас, ипак матога қора, оч қизил, сариқ, жигар рангдаги табиий иплардан тикилган кашталар яратишни ривожлантирди.
Қуёш, ой, чойнак, пиёла, чаён, қаламир нусхалари тушириб тикилган болумпўш, рўйжо, палак, сўзана, токчапўш, белбоғ, жойнамоз зардевол ва сандиқпўшлар М.Ҳамдамованинг мактабига хосдир. Уста буюм ишлаб чиқаришда бўз, адрас, чит, сатин, бахмал, шойи каби табиий матолар ва иплардан фойдаланади.
Ипларни ўзи ёнғоқ барги, пиёздан олинган табиий рангларда бўяйди. Кашталарида асосан қора ва оқ ранглар етакчилик қилади.
М.Ҳамдамованинг Самарқанд шаҳридаги каштачилик буюмлари дўкони ва Ғўс қишлоғидаги уй-устахонаси ўзбек халқ амалий санъати шайдолари бўлган чет эллик сайёҳлар аримайдиган туризм масканларидан бирига айланган.
Уста-ҳунарманд маҳаллий ҳамда хорижий кўргазмаларнинг доимий иштирокчиси ва совриндори. Ишлаб чиқарган маҳсулотларини хорижий мамлакатларга экспорт қилади. Кўплаб иқтидорли шогирдлар етиштирган.