Ўзбекистон республикаси олий ва ўрта махсус таълим вазирлиги заҳириддин муҳаммад бобур номидаги

ЎРТА ОСИЁДА “МАХСУС КЎЧИРИЛГАНЛАР” ДЕМОГРАФИЯСИ 
(ХХ асрнинг 30 – 50-йиллари) 
Абдуллаев Музробжон Ғуломович 
т.ф.н., доцент 
Андижон давлат университети 
Аннотация: мақолада ХХ асрнинг 30-50-йилларида совет давлатида лагерлар ва 
махсус манзилгоҳлар тизимининг вужудга келиши ва Ўрта Осиёдаги махсус 
кўчирилганлар демографияси таҳлил этилган. 
Таянч сўзлар: ГУЛАГ, Ўрта Осиё лагери, сургун, махсус кўчирилганлар. 
DEMOGRAPFY OF SPECIAL SETTLERS IN CENTRAL ASIA
(30-50 years of XX centuries) 
Аbdullayev Muzrobjon Gulamovich
Abstract: The article analyzes the origin and existence of the camp system and special 
settlements in the Soviet state in the 30-50's. XX century. And also demographics of special 
settlers in Central Asia are covered. 
Key words: GULAG, camp Central Asia, exile, special settlers. 
ХХ асрнинг 30-йилларида СССРда ГУЛАГ

лагерлари кўринишидаги жазо ўташ 
жойлари – концентрацион лагерлар тизими кенг ёйилди. 1930 йилда мамлакат бўйича 
179,0 минг, 1931 йилда 212,0 минг, 1932 йилда 268,7 минг, 1933 йилда 334,3 минг, 1934 
йилда 510,3 минг, 1935 йилда 725,5 минг лагер маҳбуслари бор эди. 1941 йил бошларида 
лагер маҳбуслари сони 1,5 млн. кишигача кўпайди, кейин улар сони 1946 йилда 0,6 млн. 
кишигача қисқарди. Кейинги йилларда лагер маҳбуслари сони яна тез ўсиб борди ва 1952-
1953 йилларда уларнинг сони 1,7 млн.дан ошди [1, 55-б]. 
1932 йилда СССРда 11 та лагер бўлган бўлса, 1940 йилга келиб уларнинг сони 53 
тага етди, улар кичик пункт ва бўлинмалардан иборат 600 дан ошиқ филиалларни ўзида 
бирлаштирган. ГУЛАГ лагерлари тизимида Ўрта Осиё лагери (Сазлаг) гигант лагерлардан 
саналган ва ўзида кўп минг сонли маҳбусларни жамлаган. Жумладан, 1952 йил 1январида 
Ўзбекистонда 7,9 минг, Тожикистонда 2,9 минг, Қирғизистонда 2,0 минг лагер 
маҳбуслари бўлган [2, 123-б] (Туркманистонда лагерлар бўлмаган). Лагерлар асосан, 
сиёсий маҳбусларни сақлаш жойи ҳисобланган. 

ГУЛАГ – СССР ОГПУ – НКВД нинг Лагерлар бош бошқармаси 

---

234 
СССРда Лагерлар тизими билан бирга Махсус манзилгоҳлар тизими ҳам кенгайиб 
борди. 1930-1931 йилларда мамлакатда коллективлаштириш давомида тугатилган қулоқ 
хўжаликларидан 381171 оила (1803391 киши) махсус посёлкаларга сургун қилиндики, 
бунинг натижасида “қулоқлар сургуни” деб аталган янги жазо тизими юзага келди [2, 16-
б]. 1931 йилнинг сентябрига қадар Ўрта Осиё республикаларидан 6944 оила (33278 киши) 
сургун қилинган. Улардан 159 оила (197 киши) 1930 йилда Қозоғистонга, 1931 йил август 
ойида эса 2213 оила (11401 киши) Шимолий Кавказга, 3444 оила (15910 киши) Украинага, 
1128 оила (5770 киши) Ўрта Осиё республикалари бўйлаб сургун қилинди [3, 92-94-б]. 
Бундан ташқари, 1931 йилнинг ноябрь ойи охирида Туркманистондан 1035 қулоқ оиласи 
(6863 киши) Ўзбекистонга кўчирилди [4, 462-463-б]. 
“Қулоқлар сургуни” 1931 йилдан кейин ҳам давом этди. 1932 йилда СССРнинг 
марказий районларида сургун қилиш оқими 1930-1931 йилларга нисбатан пасайгани 
ҳолда, Ўрта Осиёда кўпайди. Яъни, 1932 йилда Ўрта Осиё минтақаси бўйлаб сургун 
қилинганлар миқдори 1930-1931 йилларда ички сургун қилинганлар миқдоридан анча кўп 
бўлди. 1932 йилда Ўрта Осиё республикаларидан жами 6043 хўжалик (27799 киши) 
минтақа ичида сургун қилинди. Жумладан, Ўзбекистонда 4865 хўжалик (22505 киши) 
[5,81-82], Тожикистонда 556 хўжалик (2502 киши), Қирғизистонда 479 хўжалик (2148 
киши), Туркманистонда 143 хўжалик (644 киши) [6, 179-б] кўчирилди. Умуман, 1930-1932 
йилларда Ўрта Осиё республикаларида 12987 хўжалик (61077 киши) иттифоқнинг бошқа 
минтақаларига ва Ўрта Осиё бўйлаб сургун қилинган [7]. 
1935 йил май ойида Шимолий Кавказнинг миллий районларидан сургун қилинган 
4560 киши Ўзбекистон ССР махсус посёлкаларига, Ленинград области ва Карелиянинг 
чегара ҳудудларидан сургун қилинганлардан 425 оила (1998 киши) Қирғизистон АССР 
махсус посёлкаларига, 941 оила (3886 киши) Тожикистон ССР махсус посёлкаларига 
жойлаштирилди [6, 219-220-б]. 
ВКП(б) МК Сиёсий бюросининг 1935 йил 19 мартда қарори билан 1935-1937 
йилларда Тожикистоннинг Вахш водийсига 12 минг хўжаликни (Ўзбекистондан 3 минг, 
Тожикистондан 3 минг, СССРнинг бошқа районларидан 6 минг) сургун қилиш 
мўлжалланган бўлиб, 1936 йил апрелигача Вахшга жами 9948 кишидан иборат 3158 
хўжалик кўчириб келтирилган [8, 49-б]. 
1936 йилда Ўзбекистондан Тожикистонга аҳоли кўчириш режасининг бажарилиши 
ҳақидаги маълумотга кўра, Самарқанд районидан 120, Киров районидан 100, Жалолқудуқ 
районидан 48, Ленин районидан 43, Ойим районидан 48, Наманган районидан 108, Қўқон 
районидан 49, Молотов районидан 42, Каганович районидан 49, Андижон районидан 137, 
Чуст районидан 156, Поп районидан 100, Марғилон районидан 147, Янгиқўрғон 
районидан 207, Косонсой районидан 207, Бағдод районидан 102, Тўрақўрғон районидан 
20, жами 1683 хўжалик кўчирилган [9, 165-б]. 
1937 йил 1 январь ҳолатида Ўрта Осиё “қулоқлар сургуни”да 35497 кишидан иборат 
9117 оила бўлган. Жумладан, Ўзбекистон ССРда 3652 оила (14190 киши), Қирғизистон 
ССРда 2467 оила (11873 киши), Тожикистон ССРда 2998 оила (9434 киши) махсус 
посёлкаларда яшаган [10, 214-б]. 
1930 йиллар давомида “қулоқлар сургуни” аҳолиси турли сабабларга кўра (юқори 
ўлим даражаси, оммавий қочишлар ва бошқа) камайиб борди. Сургуннинг илк йилларида 
махсус кўчирилганлар ўртасида ўлим даражаси жуда юқори бўлган. Масалан, 1932-1935 
йилларда Ўрта Осиё “қулоқлар сургуни”да 1896 киши туғилгани ҳолда, 9647 киши ўлган 
[10, 208-211-б]. Бошқача айтганда, туғилишга нисбатан ўлим даражаси 5 баробар юқори 
бўлган. Бу йилларда махсус посёлкалардан қочиб кетганлар 18942 кишини ташкил қилди 
[10, 208-211-б]. 1939 йил 1 январь ҳолатида Ўрта Осиё “қулоқлар сургуни”да 35934 киши, 
жумладан, Ўзбекистон ССРда 13775 киши, Қирғизистон ССРда 13116 киши, Тожикистон 
ССРда 9043 киши бўлган [10, 216-б]. Йил давомида келиб қўшилганлар 4564 кишини, 
кетганлар 5091 кишини ташкил қилди. 

---

235 
1940 йилларда “қулоқлар сургуни” аҳолиси урушга сафарбар қилинганлар оила 
аъзоларининг ҳамда 16 ёшга тўлганларнинг озод қилиниши эвазига мунтазам камайиб 
борди. Бироқ, махсус кўчирилганларнинг умумий миқдори 1940-50-йиллар бошида 
узлуксиз кўпайди. Бу даврда бутун халқлар ва этник гуруҳлар (немислар, қолмиқлар, 
корейслар, қрим татарлари, чеченлар, ингушлар, қорачойлар, болқорлар ва бошқ.), 
Болтиқбўйи, Ғарбий Украина, Кавказортининг бир қисм аҳолиси махсус манзилгоҳларга 
депортация қилинди. 1937 йилнинг кузида Узоқ Шарқдан кўчирилган 172 мингдан ортиқ 
корейслардан 95526 таси Қозоғистон ҳудудларига, 76525 таси Ўзбекистон ҳудудларига, 
қолганлари эса Ўрта Осиёнинг бошқа республикаларига жойлаштирилди [2,80-81-б]. 
Корейсларнинг тўла ҳуқуқли фуқаро статуси сақланди, яъни улар “махсус кўчирилган” 
эмас эди. 1937 йил охирларида Арманистоннинг чегара районларидан кўчирилган 2100 
кишидан иборат 425 курд оиласи Қирғизистон ССРга жойлаштирилди. 
1943-1944 йилларда Шимолий Кавказ халқлари – чеченлар, ингушлар, қорачойлар, 
болқорлар депортация қилинди. Шимолий Кавказдан жами 608749 киши (чеченлар – 
362282 киши, ингушлар – 134178 киши, қорачойлар – 68327 киши, болқорлар – 37406 
киши, бошқа этник гуруҳлар – 6556 киши) [2, 105-б]. Уларнинг аксарият қисми Ўрта Осиё 
республикаларига – асосан, Қирғизистон ССР ва Тожикистон ССР ҳудудларига 
жойлаштирилди.
1944 йилнинг май-июнь ойларида Қримдан қрим татарлари, греклар, арманлар, 
болгарлар ва бошқа миллат вакилларидан иборат жами 228392 киши депортация қилинди. 
Қрим татарларидан 151720 таси Ўзбекистон ССР ҳудудларига жойлаштирилди [2, 111-б]. 
Шунингдек, грек, турк ва эронликлардан иборат 3652 киши Фарғона областига 
жойлаштирилган. 
1949 йилнинг 1 январида СССР НКВД Махсус посёлкалар бўлими ҳисобида 
2 300 223 махсус кўчирилганлар бўлиб, улардан 340 253 нафари Ўрта Осиё 
республикалари махсус манзилгоҳларида жамланган. Уларнинг републикалар бўйича 
дислокацияси ва контингентлари таркиби қуйидагича эди: Ўзбекистон ССРда – 177 099 та 
(Қримдан – 118488 та, Грузиядан – 42618 та, собиқ қулоқлар – 6699 та, немислар – 6518 
та, “власовчилар” – 1569 та, қолмиқлар – 714 та, қорачойлар – 429 та, чеченлар ва 
ингушлар – 64 та); Қирғизистон ССРда – 128 727 та (чеченлар ва ингушлар – 62583 та, 
қорачойлар – 23974 та, немислар – 14954 та, болқорлар – 14361 та, Грузиядан – 8911 та, 
“власовчилар” – 2974 та, Қримдан – 827 та, қолмиқлар – 143 та); Тожикистон ССРда – 
30 630 та (немислар – 18184 та, “власовчилар” – 5772 та, Қримдан – 4537 та, “немис 
малайлари” – 2137 та); Туркманистон ССРда – 3797 та (немислар – 2521 киши, 
“власовчилар” – 1276 киши) [2, 164-166-б]. 
1950 йилларнинг бошида СССРдаги барча махсус кўчирилганларнинг деярли 50% и 
РСФСР ҳудудларида, 36% и Қозоғистон ССР, 7% и Ўзбекистон ССР, 5% дан кўпроғи 
Қирғизистон ССР, қолган 2% га яқини эса Тожикистон, Туркманистон, Украина ва 
Карело-Фин ССР ҳудудларида жамланган эди [11, 122-б]. 
Депортация қилинган халқлардан айримлари махсус кўчирилганлар статистикасига 
киритилмаган. Масалан, 1937 йилда Узоқ Шарқдан депортация қилинган 123 минг 
корейсларнинг 74,5 мингтаси Ўзбекистон ССРга жойлаштирилган, улар “маъмурий 
сургун қилинганлар” статусида бўлиб, махсус манзилгоҳлар рўйхатига олинмаган. 
Сталин вафотидан кейин мамлакат ижтимоий-сиёсий ҳаётидаги ўзгаришлар лагерлар 
ва махсус манзилгоҳлар тизимига ҳам таъсир кўрсатди. 1953 йил 1 январидан 1959 йил 1 
январига қадар СССРдаги лагер маҳбуслари миқдори 4,5 мартага, махсус кўчирилганлар 
миқдори эса 56 мартага қисқарди. Агар 1952-1953 йилларда мамлакатда 100 га яқин жазо 
лагерлари фаолият кўрсатган бўлса, 1959 йилда улардан фақат 29 таси қолди, холос.