Ўзбекистон республикаси олий ва ўрта махсус таълим вазирлиги в. И. Зуев, О. Қодирхўжаев, М. М. Адилов, У. И. Акрамов сабзавотчилик ва полизчилик

Бодрингни иситилмайдиган плёнкали иссиқхоналарда етиштириш. Қуёш билан иситиладиган баҳорги плёнкали иссиқхоналарда бодринг баҳорги-ёзги айланиш даврида етиштирилади. Республиканинг жанубида бу иншоотлар иссиқсевар экинларни етиштириш учун феврал охири, марказий минтақаларда эса – мартнинг иккинчи декадасидан бошлаб фойдаланилади. Баҳорги иссиқхоналардан яна ҳам эртароқ фойдаланиш кечасидаги паст ҳарорат туфайли лимитланган (чегараланган).
Плёнкали иссиқхоналар фойдаланилган экинларни экиш ёки ўтқазишга 10-15 кун қолганда тўлиқ тайёр бўлиши керак, чунки тупроқ ва ҳаво яхши исиши лозим. Бодрингни иккинчи экин сифатида кўчат ва кўкат экинлардан кейин етиштириш маъқул.
Баҳорги плёнкали иссиқхоналар учун уруғларни экишга тайёрлаш ва кўчатларни етиштириш усуллари қишки иссиқхоналардаги билан бир хил. Лекин уруғ ва кўчатлар албатта чиниқтирилади. Плёнкали иссиқхоналарга 20-30 кунлик кўчатлар экилганда яхши натижа олинади.
Тошкент ҚХИ тажрибаларидан маълум бўлишича, Манул дурагай учун лентасимон усулда см ва см экиш шакли энг яхши ҳисобланади. Баъзан кенг қаторли усулда, қаторлар ораси 70-80 см ва ўсимликлар орасидаги масофа 25-30 см қилиб экилади. Ленталар ва қаторларни ҳам сарров йўналишида, ҳам иссиқхонага кўндаланг жойлаштириш мумкин.
Ўсимликларнинг иссиқлик тартиботига талаби қишки-баҳорги даврдаги билан бир хил, аммо тупроқ ҳароратини +16°С дан пастга тушишига йўл қўймаслик керак. Суғоришлар эрталабки соатларда ўтказилади. Майнинг ўрталарида иссиқхонадан плёнкалар олинади, лекин экинни ўстириш июн охиригача давом этади.
Ҳароратнинг кескин ўзгариши, плёнканинг ички юзасида шудринг томчиларининг (конденсат) маҳсулот бўлиши замбуруғ касалликларининг ривожланишига имкон беради. Чириш пайдо бўлганда ҳаво намлиги 70% гача камайтирилади.
Бодринг экилган иссиқхоналарни шамоллатишда елвизакка йўл қўймаслик керак.
Плёнкали иссиқхоналарда бодринг маҳсулоти Республикамизнинг марказий қисмида апрелнинг иккинчи ярмидан бошлаб чиқади ва июн ўрталаригача, яъни очиқ ердан маҳсулот чиққунгача давом этади. Баҳорги иссиқхоналар шароитида мевалар тез ўсади, шунинг учун маҳсулот мунтазам – кун ора терилиши ва барраларнинг сарғайиб кетишига йўл қўймаслик керак.