Ўзбекистон республикаси олий ва ўрта махсус таълим вазирлиги в. И. Зуев, О. Қодирхўжаев, М. М. Адилов, У. И. Акрамов сабзавотчилик ва полизчилик

Техник усулда иситиш деганда, ҳар хил ёнилғи турларидан (мазут, нефт, газ), иссиқлик энергияси, электр энергияси, геотермал манбалар иссиқлиги ва шу кабилардан фойдаланиш назарда тутилади.
Қизиган сув ёрдамида иситиш – иситишнинг юқори фойдаланиш кўрсаткичларига эга бўлган кўп тарқалган туридир. Бир текис ва осон бошқариш режими, зарарсизлиги, меҳнатни кам талаб қилиши, иссиқликдан фойдаланиш коэффитсиэнтининг юқорилиги (65-70%). Иссиқлик ҳарорати 30-90°С бўлган сувдан олинади. Сувли иситиш тизими иссиқлик манбайи (ТЭТС, саноат корхонаси қозонхонаси, геотермал сувлар ва шу кабилар), иссиқ сувлар иссиқхонага келадиган ва қайтиб кетадиган магистрал қувурлар ва иситиш асбоблари (металл, асбатсемент, полиэтилен, қувурлар, радиаторлар) ни қамраб олиб, улар девор бўйлаб ва ерга ўрнатилади, иссиқхонанинг ойнаванд томи остига осиб қўйилади. Сувли иситилишда тизимида сув айланишини таъминловчи воситалардан фойдаланилади.
Ҳаво орқали иситишда қўшимча ёки авария вақтида иситиш сифатида фойдаланилади. Махсус қурилма – калориферларда қизитилган ҳаво вентилаторлар орқали иссиқхонага юборилади. Ерни иситиш учун тупроқ остига қувур ётқизилади ёки ҳаво каналлари ўрнатилади.
Газли иситиш ўстириш иншоотлари ичида газни бевосита ёқиш орқали амалга оширилади. Иситишнинг бу усули қурилманинг соддалигига, иситиш тизимини қуриш сарфларини камайтиришига қарамай ҳозирча фақат айрим хўжаликлардагина ишлатилмоқда. Газли иситиш мақсадларида ўсимликлар учун зарарли бирикмалари йўқ бўлган газдан фойдаланиш мумкин. Газли иситишнинг нуқсонлари: иссиқлик ва ҳаво намлиги режимининг бир текис эмаслиги.
Электр иситиш электр токи қаршилигининг салмоғи катта ўтказгичлар орқали ўтқазишга асосланади, бунинг натижасида электр токининг маълум қисми иссиқлик энергиясига айланади. Унда электродлар, асфалт-бетон иситиш элементлари ҳамда махсус иситиш симларидан фойдаланилади. Электрли иситишни автоматик бошқариш мумкин, яхши ишлайди ва ўсимлик учун зарарсиз.
Сунъий иситиладиган иншоотларда қуёш энергиясини ушлаб қолишни ва иссиқликнинг йўқолишига қарши курашни яхшилаш ўз аҳамиятини йўқотмайди, чунки бу ёнилғи ва меҳнат сарфини камайтиради.