Ўзбекистон республикаси олий ва ўрта махсус таълим вазирлиги в. И. Зуев, О. Қодирхўжаев, М. М. Адилов, У. И. Акрамов сабзавотчилик ва полизчилик

Баҳорги-ёзги айланиш. Помидор баҳор-ёзги айланишда иситилмайдиган плёнкали иссиқхоналарда етиштирилади. Бу мавсумда эрта маҳсулот тўплайдиган ва бир меъёрда маҳсулот берадиган детерминант нав ва дурагайлардан фойдаланиш мақсадга мувофиқ бўлади.
Кўчат республиканинг марказий минтақаларида март ойининг ўрталарида экилади, маҳсулоти апрел ойининг сўнгги декадасида пишабошлайди. Май ойи ва июн ойининг биринчи ярмида энг кўп миқдорда маҳсулот олинади. Сўнгги маҳсулот июн охирида йиғиштирилади. Иссиқхонага кўчатлар қаторлаб 7035-40 см шаклда ёки кўпинча қўшқаторли лента усулида ораси 50-60 см ва ўсимлик туплари ораси 25-40 см дан қилиб экилади.
Помидор ўсимликлари тик каноп бағазда ўстирилади. Унга бир ёки икки пояли қилиб шакл берилади. Тезпишар навлари 3-4 гул шингилидан сўнг, баланд бўйли ўртапишар навлари 5-6 шингилларидан сўнг чилпилади.
Плёнкали иситилмайдиган иссиқхоналарда помидорни парваришлашда ҳаво ҳарорати ва намлигини тегишли меъёрда сақлаш тавсия этилади. Бунда кундузги ҳароратни +25-27°С, кечаси +14-16°С да ва ҳавонинг намлиги шамоллатиш ёрдамида 60-70% атрофида сақланиши лозим. Парваришлаш ишлари мунтазам суғориб туриш, озиқлантириш, 3-4 марта чопиқ қилиш, касаллик ва зараркунандаларга қарши курашишдан иборат.
Помидор мавсумда 3-4 марта озиқлантирилади. Ҳар озиқлантирилгандан сўнг, ўсимликлар бағрига янги тупроқ тортилади ёки янги тупроқ сочилади. Минерал ўғитлар бериш меъёри ва нисбати ўсимликларнинг ривожланиш фазасига ва тупроқдаги минерал элементлар миқдорига боғлиқ. Минерал ўғитлар органик ўғитлар билан навбатлаб берилади. Макроэлементлар билан бир қаторда 2-3 марта микроэлементлар билан ҳам озиқлантирилади.
Помидор маҳсулоти апрел охири, май бошларидан, иссиқхонадан плёнкалар олиб ташлангаандан сўнг чиқабошлайди. Бунда навлар ва экиш муддатлари тўғри танланса ва ўз вақтида тегишли парваришлаш тадбирлари ўтказилса, июл ойигача (очиқ майдондан маҳсулот чиққунча) иссиқхоналарнинг ҳар 1 м² майдонидан 4-5 кг дан жами 6-8 кг гача маҳсулот олиш мумкин.