Ўзбекистон республикаси олий ва ўрта махсус таълим вазирлиги тошкент давлат иқтисодиёт университети туризм асослари

1 - илова
Ўзбекистоннинг тарихий ва маданий ёдгорлик ресурслари
Ўзбекистон Республикаси туризм марказлари
Пойтахти Тошкент шаҳри. Иқлими - мўътадил, субтропик иқлим. Давлат тузуми - республика. Майдони - 447,4 минг кв. км., аҳолиси - 25 млн., тили - ўзбек, дини - ислом, пул бирлиги - Ўзбекистон сўми.
Ўзбекистон тарихи ва келажаги буюк давлат. Энг қадимги маданият дурдоналари. IX - XV асрлардаги маданий ҳаёт. Ўзбекистоннинг "Буюк ипак йўли"даги марказий ҳудуд эканлиги.
Кўҳна маданият марказлари: археология - Афросиёб, Варахша, Сополли тепа, Фаёз тепа, Шош тепа, Оқ тепа, Шоҳрухия ёдгорликлари; давлатчилик - Хоразм, Бақтрия, Сўғд, Кушон, Қанғ давлатлари; шаҳарсозлик - Самарқанд, Бухоро, Хива, Шаҳрисабз, Термиз, Қўқон, Тошкент, Кармана, Қарши кентлари; меъморчилик - Шоҳизинда, Занги ота, Баҳовуддин Нақшбанд, Шайҳ Ҳованди Тоҳур мажмуалари; Регистон, (Улуғбек, Тиллакори, Шердор), Кўкалдош, Бароқхон, Абдулқосим мадрасалари; Гўри Амир, Руҳобод, Бибихоним мақбаралари; масжидлар ва бошқа иншоотлар; ҳунармандчилик - санг (тош) тарошлик, заргарлик, зардўзлик, мисгарлик, ёғоч ўймакорлик, ганч ўймакорлик; санъат - адабиёт, мусиқа, рақс, ҳайкалтарошлик, миниатюра ва рассомчилик, ҳаттотлик, каштачилик ва бошқалар.
Ўзбекистонда мустақиллик йилларида бунёд этилган меъморчилик ва шаҳарсозлик. "Буюк ипак йўли"нинг қайта тикланиши. Алишер Навоий, Амир Темур, Бобур Мирзо, Аҳмад ал - Фарғоний, Алпомиш ҳайкалларининг, Баҳовуддин Нақшбанд, Имом ал - Бухорий, Бурҳонуддин ал - Марғиноний, Абу Мансур Мотурудий ёдгорлик мажмуаларининг, темурийлар тарихи Давлат музейи, Хотира майдони, Шаҳидлар хотираси хиёбони обидаларининг барпо этилиши ва уларнинг туризм марказлари сифатида намоён бўлиши.
Интерконтиненталь, Шератон, Ле Меридиан, Афросиёб меҳмонхоналарининг, Ҳайвонот боғи, Аквапаркларнинг очилиши. Тошкент, Самарқанд, Бухоро, Хива, Термиз, Шаҳрисабз, Андижон, Наманган, Фарғона, Марғилон, Жиззах, Гулистон каби шаҳарларнинг замонавий қиёфага кириши, улардаги меъморчилик биноларининг миллийлик хусусиятлари.
Ўзбекистон Республикаси Вазирлар Маҳкамасининг 1992 - йил 3 - ноябрда "Баҳовуддин Нақшбанд таваллудининг 675 йиллигини нишонлашга тайёргарлик кўриш тўғрисида"ги, 1993 - йил 23 - апрелда "1994 - йилда ўрта асрларнинг буюк олими Муҳаммад Тарағай Улуғбекнинг 600 йиллик юбилейини ўтказиш тўғрисида"ги, 1994 - йил 29 - декабрда "Амир Темур таваллудининг 660 йиллигини нишонлаш тўғрисида"ги, 1996 - йил 3 - январда "Бухоро ва Хива шаҳрининг 2500 йиллик юбилейини нишонлашга тайёргарлик кўриш тўғрисида"ги, 1997 - йил 29 - апрелда "Имом ал - Бухорий таваллудининг ҳижрий - қамарий тақвим бўйича 1225 йиллигини нишонлаш тўғрисида"ги, шу йили 27 - ноябрда "Аҳмад ал - Фарғоний таваллудининг 1200 йиллигини нишонлаш тўғрисида"ги, шу йили 23 - декабрда "Буюк мусаввир Камолиддин Беҳзод таваллудининг 545 йиллигини нишонлаш тўғрисида"ги, 1999 - йил 27 - декабрда "Термиз шаҳрининг 2500 йиллигини нишонлашга тайёргарлик кўриш ва ўтказиш тўғрисида"ги қарорларининг тарихий аҳамияти ва уларнинг туризм ишига қўшган улкан ҳиссаси.