Ўзбекистон республикаси олий ва ўрта махсус таълим вазирлиги низомий номидаги тошкент давлат педагогика университети

ЎЗБЕКИСТОН РЕСПУБЛИКАСИ ОЛИЙ ВА ЎРТА МАХСУС ТАЪЛИМ ВАЗИРЛИГИ
НИЗОМИЙ НОМИДАГИ ТОШКЕНТ ДАВЛАТ ПЕДАГОГИКА УНИВЕРСИТЕТИ

“140000 – ЎҚИТУВЧИЛАР ТАЙЁРЛАШ ВА ПЕДАГОГИКА ФАНИ” ТАЪЛИМ СОҲАСИ БАКАЛАВРИАТ ТАЪЛИМ ЙЎНАЛИШЛАР УЧУН ФАНЛАРДАН КУРС ҲАМДА БИТИРУВ МАЛАКАВИЙ ИШЛАРНИ ТАЙЁРЛАШГА ДОИР МЕТОДИК ҚЎЛЛАНМА

Муаллифлар:

Д. Эргашев. п.ф.н., доцент
С. Мухамедова - филология фанлари доктори, доцент
С. Одилова - филология фанлари номзоди
З. Жалолиддинов - тадқиқотчи

Университет илмий кенгашининг 2008 йил -------------------------- қарори билан тасдиқланган

Тошкент
2008 йил
Кириш

I. Курс ишларига қўйиладиган талаблар

Курс ишларини бажариш ва шакллантириш ўрта ва олий педагогика муассасаларидаги энг муҳим ва истиқболли илмий тадқиқот тури ҳисобланади. Талаба ва ўқитувчининг ҳамкорлигида бўлғуси педагогнинг шахси шаклланади, долзарб педагогик ва методик муаммоларни ҳал қилиш, илмий педагогик ва психологик адабиётларни мустақил тушуниш, назарий билимларни амалиётда қўллаш кўникмаси ривожланади.

Курс ишини бажариш ўқув режасида кўзда тутилган ва ҳар бир талаба учун зарурийдир. Талаба курс ишини бажариш натижасида ўзининг тадқиқот олиб бориш имкониятини кўрсата билиши керак. Шу мақсадда бўлғуси ўқитувчилар қўйидаги малака ва кўникмаларга эга бўлиши зарур:
а) педагогика, психология, фалсафа, социология фанлари бўйича библиографик кўрсаткичлардан фойдаланишни ўрганиш;
б) мавзу бўйича минимал даражадаги муайян адабиётларни ўрганиш ва зарурий маълумотларни қайд қила олиш;
в) замонавий адабиётларни таҳлил қилиш натижасида ўрганилаётган масаланинг ҳолатини изчил баён қилиш;
г) агар мавзу учун зарурий бўлса, турли типдаги таълим муассасаларидаги педагогик тажрибаларни йиғиш, таҳлил қилиш ва умумлаштириш;
д) тажриба-синов ишини ўтказиш, қўлга киритилган эмпирик материални қайта ишлаш, уни таҳлил қилиш, тизимга солиш, изоҳлаш ва зарурий хулосаларни чиқариш.