Ўзбекистон республикаси олий ва ўрта махсус таълим вазирлиги мухаммад ал хоразмий номидаги тошкент ахборот технологиялари университети

Мавзу бўйича асосий тушунча ва атамалар


Режалаштириш – бу раҳбарият харакатларининг ягона йўналишини, ташкилот аъзоларининг умумий мақсадларига эришиш йўлидаги харакат бирлигини таъминлаш воситаларидан биридир.
Стратегик режалаштириш- раҳбарият томонидан қўлланиладиган ва ташкилот ўз мақсадларига эришиши учун ёрдам берадиган ўзига мос стратегияни ишлаб чиқишга олиб келадиган харакатлар, тадбирлар, қарорлар тўпламидир.
Йиллик режа - кутубхона фаолиятининг асосий йўналишлари, жорий йилдаги мухим вазифалари ва иш мазмуни, ижтимоий ва маданий- маърифий ишлари, китобхонларни жалб қилиш, адабиётлар берилиши, оммавий тадбирлар ўтказиш ва хокозолар бўйича миқдорий кўрсаткичларни белгилайди.
Кутубхона ички режаси- алоҳида кутубхона ҳамда унинг таркибий бўлинмалари- бўлим, шуъба (сектор), гурух, шунингдек айрим ходимлар фаолиятини белгилайди.
Истиқболни белгилаш – бу ҳаёт тараққиёти қонуниятларини ўрганиш асосида у ёки бу ходисанинг келажагини олдиндан кўришдир. Келажакни идрок этиш истиқбол, айниқса узоқ муддатли режаларни илмий ишлаб чиқиш учун мухимдир
Экстраполяция усули ( ёки тўғри усул) статистикадан кенг фойдаланишга асосланади ва ўтган вақтнинг қатор қўрсаткичлари бўйича уларнинг кейинги даврдаги қийматини хисобга олишдан иборат бўлади. Экстраполяция ривожланишнинг вужудга келган тенденцияларидан келиб чиқади ва уларнинг айрим вақт оралиғи давомидаги муайян параметрлари доимийлигини шарт қилиб қўяди.
Экспертиза усули ( ёки эксперт баҳолаш) ўрганилаётган ходисанинг ривожланиши ёки экспертлар- олимлар ёки фаолиятнинг бирон- бир сохасининг юқори малакали мутахассисларининг фикр-мулохазаларини ўрганиш йўли билан янгиликнинг вужудга келиши мумкинлиги тўғрисида олинган маълумотлардан иборатдир.
Моделлаш усули - истиқболи белгиланаётган объектнинг математик моделларини ишлаб чиқишдан иборатдир.
Мавзуни ўзлаштириш учун саволлар

1. Режалаштириш нима?

2. Стратегик режалаштириш деганда нимани тушунасиз?
3. Кутубхона- ахборот фаолиятини режалаштириш қандай тамойилларга асосланади?
4. Кутубхоналарда қайси турдаги режалар ишлатилади?
5. Истиқболни белгилаш деганда нимани тушунасиз?
6. Истиқболни белгилашнинг қандай усулларини биласиз?