Ўзбекистон республикаси олий ва ўрта махсус таълим вазирлиги гулистон давлат университети б.Қурбанов, Ш. Турабоева

Механик (физик-механик) усул меҳнат предметига механик таъсир этиш, чунончи материалларни кесиш, қирқиш, деталларни винтлар, мих парчинлар билан бириктириш, пресслаш ва ҳоказолар орқали амалга ошадиган технологик жараёнларни ўз ичига олади.
Кимёвий усул билан меҳнат предметлари кимёвий реакциялар ҳисобига ўзгарадиган технологик жараёнлар амалга оширилади. Бу усул фақат бевосита кимё саноатида эмас, балки халқ хўжалигининг бошқа тармоқларида, масалан, электротехника саноатида айрим электроизоляцион ва ўтказгич материаллар тайёрлашда, қишлоқ хўжалигида зараркунандаларга қарши курашишда, машинасозликда металларни каррозиядан сақлашда ҳам кенг қўлланади.
Биологик усуллар меҳнат предмети жонли организмларда рўй берадиган биокимёвий жараёнлар таъсирида ўзгариши билан характерланади. Биологик усуллар саноатнинг бир қанча тармоқларида, масалан, озиқ-овқат, кимё, енгил саноатда кенг тарқалган, Шунингдек, улар металлургияда ҳам ўрин олган бўлиб, махсус бактериялар ёрдамида рудадан айрим металларни (мис, марганец, хром ва б.) ажратиб олиш йўллари топилмоқда.
Энергетик усуллар энергиянинг электр, ядро ва бошқа турларидан бевосита фойдаланиш амалга ошириладиган технологик жараёнларни ўз ичига олади. Масалан, мис ва алюминий электролиз йўли билан олинади (буни физика ва кимё дарсларида билиб олиш мумкин), кўп деталлар юқори частотали токлар билан мустаҳкамланади ва ҳ.
Бир қатор материалларни ишлаш технологияси юқорида кўриб чиқилган асосий усуллар комбинациясига таянади.
Комбинациялашган усулнинг мисоли сифатида металлга ҳимояловчи ва декоратив қопламаларни электрокимёвий метод билан суртишни кўрсатиш мумкин. Деталларга электрофизик усулда ишлов бериш ҳам комбинациялашган усулга киради. Буюмнинг намунаси материалларни электронлар тутами билан ишлаш (пайвандлаш, кесиш)дир.
Технологик жараён технологик операциялардан ташкил топади. Технологик операция-технологик жараённинг тугалланган қисми бўлиб, уни ишчи (ёки ишчилар гуруҳи) узлуксиз битта иш ўрнида битта буюмни тайёрлаш (заготовка, детал йиғиш бирлиги ва ҳ.) бўйича бажаради.