Ўзбекистон республикаси олий ва ўрта махсус таълим вазирлиги фарғона давлат университети педагогика факультети

Халқаро Олимпия
Кўмитасининг еттинчи Президенти




ХУАН АНТОНИО САМАРАНЧ

Самаранч (Samaranch) Хуан Антонио, маркиз (1920 йил 17 июль, Барселона, Испания) — Халқаро Олимпия Қўмитасининг еттинчи Президенти.

Хуан Антонио Самаранч университетнинг тижорат факультетини тугаллагандан сўнг бизнес фаолиятини спорт устозлиги билан қўшиб олиб борди. У ёшлигида бокс, роликли конькида хоккей билан шуғулланган. Кейинчалик у устозлик қилган Испаниянинг роликли хоккей жамоаси жаҳон чемпиони ҳам бўлган.
1940—1950 йилларда Хуан Антонио Самаранч Барселона муниципалитетининг маслаҳатчиси бўлган, сўнг Испания роликли хоккей миллий федерациясининг президенти этиб сайланган.
1963 йилда Хуан Антонио Самаранч Испаниянинг спорт олий кенгаши раҳбари лавозимига тайинланади. У 1955 йилда Барселонада ўтказилган иккинчи Ўрта денгиз ўйинларининг ташкилотчиларидан биридир. У 1956 йилдаги VII қишки Олимпиада, 1960 йилги XVII ва 1964 йилги XVIII олимпия ўйинларида Испания спорт делегациясининг раҳбари бўлган.
1967 йилда Хуан Антонио Самаранч Испания миллий олимпия қўмитасининг Президенти этиб сайланади. У 1968 йилдан Халқаро Олимпия Қўмитаси протоколи раҳбари, 1970 йилдан ХОҚ Ижроия қўмитаси аъзоси, 1974 йилдан ХОҚ вице-президентидир. У 1977 йилда Испаниянинг собиқ Иттифоқдаги элчиси бўлган.
1980 йил июль ойида ХОҚнинг 83-сессиясида Хуан Антонио Самаранч овоз беришнинг биринчи босқичидаёқ Халқаро Олимпия Қўмитаси Президенти этиб сайланди.
Хуан Антонио Самаранч бу лавозимни эгаллаши билан олимпия ҳаракатини давр талабига мослаштириш, ХОҚ фаолияти доирасини кенгайтириш, спортда допингга қарши курашиш каби асосий тамойилларни ўз ичига олган фаолият дастурини эълон қилди.
1982 йил бошида Хуан Антонио Самаранч Бирлашган Миллатлар Ташкилоти Бош котибига БМТ томонидан Халқаро Олимпия Қўмитасининг мутлақ мустақиллигини ҳамда унинг жаҳоннинг хохлаган қисмида ташқаридан бирон-бир аралашувларсиз олимпия ўйинларини ўтказиш ҳуқуқини эътироф этиш таклифи билан мурожаат қилди.
Хуан Антонио Самаранч раҳбарлигида ХОҚ XIV, XV, XVI, XVII, XVIII қишки Олимпиадалар ҳамда ХХIII, XXIV, XXV, XXVI, XXVII олимпия ўйинларини ўтказди.
1986 йилдан профессионал спортчиларнинг олимпия ўйинларида иштирок этишларига рухсат берилиши ҳам Самаранч номи билан боғлиқ.
1991 йилда Испания қироли Хуан Карлос Хуан Антонио Самаранч Тореллога маркиз унвонини марҳамат қилди.
2000 йилда Хуан Антонио Самаранч ўз хоҳишига кўра ХОҚ Президенти лавозимидан истеъфога чиқди. У 2010 йил 21 апрелда юрак хасталиги билан
90 ёшда вафот этди.