Ўзбекистон Республикаси Ички ишлар вазирлиги олий таълим муассасалари курсант ва тингловчиларининг битирув малакавий иши тўғрисида низом

Ўзбекистон Республикаси Ички ишлар

вазирининг 2017 йил 13 ноябрдаги

246-сон буйруғига

ИЛОВА
Ўзбекистон Республикаси Ички ишлар вазирлиги олий таълим муассасалари курсант ва тингловчиларининг битирув малакавий иши тўғрисида НИЗОМ

1-§. Умумий қоидалар

1. 
   Ушбу Низом Ўзбекистон Республикасининг «Таълим тўғрисида»ги, «Кадрлар тайёрлаш миллий дастури тўғрисида»ги қонунлари, Ўзбекистон Республикаси Президентининг 2017 йил 23 майдаги ПҚ-2991-сон «Ёнғин хавфсизлиги соҳасида кадрларни тайёрлаш, қайта тайёрлаш ва малакасини ошириш тизимини такомиллаштириш чора-тадбирлари тўғрисида»ги ва 2017 йил 16 августдаги ПҚ-3216-сон «Ички ишлар органлари ходимларини тайёрлаш, қайта тайёрлаш ва малакасини ошириш тизимини тубдан такомиллаштириш чора-тадбирлари тўғрисида»ги қарорларига мувофиқ бўлиб, Ўзбекистон Республикаси Ички ишлар вазирлиги (бундан буён матнда ИИВ деб юритилади) олий таълим муассасалари (бундан буён матнда ОТМ деб юритилади) курсант ва тингловчилари томонидан битирув малакавий иши тайёрланиши ва ҳимоя қилиниши тартибини, шунингдек тадқиқот ишининг мазмуни ва сифатига қўйиладиган мезонлар ва талабларни белгилайди.
   

Ўзбекистон Республикаси Президентининг тегишли қарорларига мувофиқ ОТМ мутахассисликлари бўйича кадрлар тайёрлашнинг бир поғонали тизимида олинадиган олий маълумот магистр даражасига тенглаштирилганлиги боис, ушбу муассасалар курсант ва тингловчилари томонидан тайёрланадиган битирув малакавий ишлари, мазмун ва сифат жиҳатидан, магистрлик диссертациясига қуйиладиган талаблар даражасида бажарилади.

2. 
   Битирув малакавий иши курсант (тингловчи) томонидан таълим олиш, ўқув дастурларини ўзлаштириш жараёнида эгалланган назарий ва амалий билимлар асосида бажарилган илмий-тадқиқот ишларининг натижаси ҳисобланади.
   

3. 
   Битирув малакавий ишини бажаришдан мақсад битирувчининг мустақил фикр юритиш ва ижодий меҳнат қилиш кўникмаларини шакллантириш, шунингдек ички ишлар органлари фаолиятининг муайян соҳасига доир билимларни мукаммал ва чуқур эгаллашига эришишдан иборат.
   

4. 
   Тадқиқот мавзусининг хусусиятидан келиб чиқиб, ОТМ Илмий кенгаши қарори асосида курсант (тингловчи)лар амалдаги махфийлик тартибига риоя қилган ҳолда ёпиқ мавзулар бўйича битирув малакавий ишини тайёрлаши мумкин.