Ўзбекистон республикаси ички ишлар вазирлиги академияси дастлабки тергов ва криминалистика кафедраси тергов фаолияти мутаҳасислиги

Фотожадвални расмийлаштириш қоидалари. Ҳодиса жойида олинган фотосуратлар бўйича фотожадвал тузилади ва ҳодиса жойини кўздан кечириш баённомасига илова қилинади. Фотожадвал қуйидагича расмийлаштирилади:
- оқ стандарт қоғозга қандай ҳодиса, қачон, қаерда содир этил-ганлиги ва ушбу ҳодиса юзасидан кўздан кечириш баённомасига фотожадвал илова қилинаётганлиги тўғрисида маълумот ёзилади;
- ушбу фотожадвалнинг бир варағида бир дона фотосурат жойлаштирилиши ва ҳар бир фотосуратнинг ўлчами камида 9х12 см ни ташкил этиши зарур;
- фотожадвалдаги ҳар бир расмнинг остида ушбу расмнинг изоҳи бўлиши шарт;
- фотожадвалдаги расмлар сифат кўрсаткичлари (аниқлик, тиниқлик, равшанлик ва бошқалар) талабига жавоб бериши керак;
- фотожадвалнинг ҳар бир расми жойлаштирилган варағида ушбу фотожадвални тузган ходим (терговчи, криминалист мутахассис) нинг исми, отасининг исми ва фамилияси ҳамда имзоси бўлиши шарт;
- фотожадвалнинг ҳар бир расми эКБнинг штампи билан тасдиқланиши керак.
Ушбу фотожадвал криминалист мутахассис томонидан тайёрланган бўлса, терговчи уни олиш учун ЭКБнинг «Ҳодиса жойини кўздан кечириш» (ҲЖКК) журналига фотожадвални олганлиги тўғрисида имзо чекади. Фотожадвалларни тайёрлаш учун меъёрий ҳужжатларга асосан, тергов шошилинч тадбирларни талаб этмаган ҳолларда, 5 кун муддат белгиланган.⁹
Ҳодиса жойининг режа-схемасини чизиш қоидалари. Ҳодиса жойидаги ҳолатни кўз олдига яққол келтириш учун, албатта ҳодиса жойининг режа-схемаси чизилади ва ҳодиса жойини кўздан кечириш баённомасига илова қилинади. Режа-схема чизиш ҳодиса жойини график қайд этиш, демакдир. Режа-схема чизилганидан сўнг, холислар, кўздан кечиришнинг қатнашчилари ва уни чизган ходим ҳамда терговчи чизманинг тўғрилигини ўзларининг имзолари билан тасдиқлайдилар. Режа-схемада ҳодиса жойини кўздан кечириш баённомасида тасвирланган барча ҳолатлар қайд этилиши керак. Режа-схема кейинчалик гувоҳлар ёки айбланувчиларнинг кўрсатмаларини аниқлашда ва текширишда муҳим ўрин эгаллайди.
Режа-схема ҳодиса жойини қайд этишнинг энг оммавий турларидан бири бўлиб, унинг қуйидаги кўринишлари мавжуд: мўлжалли, кенг кўламли, қисмли ва муфассал.