Ўзбекистон республикаси Адлия вазирлиги тошкент шаҳар юридик коллежи

Фаннинг мақсади ва вазифалари
“Давлат ва ҳуқуқ назарияси” фанини ўқитишдан мақсад талабаларда давлат ва ҳуқуқнинг вужудга келиши, ривожланиши, ҳаракатда бўлиши (фаолият кўрсатиши) ва истиқболи тўғрисидаги энг умумий қонуниятлар юзасидан илмий тушунчаларни шакллантиришдир.
“Давлат ва ҳуқуқ назарияси” фанининг вазифаси талабаларда давлат ва ҳуқуқнинг келиб чиқиши, давлат тушунчаси, белгилари, моҳияти ва типлари, давлат функциялари, давлатнинг шакллари, давлат ҳокимиятини амалга ошириш механизми, ижтимоий муносабатлар ва ҳуқуқ, ҳуқуқий онг ва ҳуқуқий маданият, ҳуқуқ нормалари, ҳуқуқ шакллари (манбалари), ҳуқуқ ижодкорлиги, ҳуқуқ тизими, ҳуқуқий муносабатлар, ҳуқуқни амалга ошириш, ҳуқуқ нормаларини шарҳлаш, юридик амалиёт, ҳуқуқий ҳулқ-атвор, ҳуқуқбузарлик ва юридик жавобгарлик, ҳуқуқий тартибга солиш механизми, қонунийлик ва ҳуқуқий тартибот, давлат ва ҳуқуқни ривожланиш истиқбол ва йўллари борасидаги умумназарий билимларни ўргатишдан иборат.


Таълимни ташкил этиш услублари
“Давлат ва ҳуқуқ назарияси” фани бўйича дарс машғулотлари “Бакалавриат” босқичининг биринчи курси 1-2 семестрларида ҳафтасига 4 соат ҳажмда ўтказилади. Унинг 2 соати маъруза, 2 соати семинар машғулотидан иборат.
Маъруза ва семинар машғулотлари интерфаол усулда ҳозирги замон педтехнологиялари, яъни case-study, экспресс-сўровлар, тест сўровлари, ақлий ҳужум, гуруҳли фикрлаш, кичик гуруҳлар билан ишлаш, коллоквиум ўтказиш, ва бошқа интерактив таълим усулларини (ечимлар дарахти, ишбилармон ўйини, дебатлар ва ҳ.к.) қўллаш, компьютер технологияси ва презентациялардан фойдаланган ҳолда ўқитувчи раҳбарлиги остида ҳамда талабаларнинг фаол иштироки асосида ўтилади.
Семинар машғулотлари талабаларда таҳлилий дунёқарашни ривожлантириш ҳамда нотиқлик, ўз фикр ва мулоҳазаларини мустақил асослаб бериш ва ҳимоя қилиш кўникмаларини шакллантиришга қаратилган.


Фан бўйича талабаларнинг билими, кўникма ва малакаларига қўйиладиган талаблар
“Давлат ва ҳуқуқ назарияси” фанини якунлагандан сўнг талаба:

• 
  давлат ва ҳуқуқнинг моҳияти, унинг энг муҳим белгилари;
  
• 
  давлат ва ҳуқуқнинг амал қилиши;
  
• 
  давлат шакллари, функциялари, механизми;
  
• 
  давлат ва ҳуқуқнинг ҳозирги замон тушунчаси;
  
• 
  ҳозирги замон давлати ва ҳуқуқининг нисбати кабилар ҳақида тасаввурга эга бўлиши.
  
• 
  ҳозирги замон давлатини демократлаштириш масалаларида;
  
• 
  давлат ва ҳуқуқнинг ўрни ҳақидаги назарий билимларни;
  
• 
  ҳуқуқий нормаларни ишлаб чиқишда ҳуқуқ назарияси ҳақидаги билимларни;
  
• 
  давлат органларини ташкил этиш ва фаолияти тамойилларини билиш борасида билим ва кўникмаларни эгаллаши.
  
• 
  норматив-ҳуқуқий ҳужжатларни шарҳлаш ва қўллаш;
  
• 
  норматив-ҳуқуқий ҳужжатлар лойиҳасини ишлаб чиқиш;
  
• 
  амалдаги қонунчиликни ҳуқуқий экспертизадан ўтказиш;
  
• 
  қабул қилинаётган норматив-ҳуқуқий ҳужжатларни Конституцияга ва халқаро-ҳуқуқий стандартларга мос келиши бўйича мониторинг ўтказиш;
  
• 
  ҳуқуқий хусусиятдаги ҳужжатларни тузиш, қонун доирасида ҳуқуқий қарорлар қабул қилиш ва бошқа ҳуқуқий ҳаракатларни амалга ошириш амалий кўникмаларини эгаллаши керак.