Ўзбекистон республикаси адлия вазирлиги тошкент давлат юридик институти шорахметов шоакбар шорустамович

IV-БЎЛИМ. СУД ҚАРОРЛАРИНИНГ ИЖРОСИ


370-м о д д а. Суд қарорларини ижро этиш тартиби


Қонуний кучга кирган суд қарорлари барча давлат орган­лари, ташкилотлар, мансабдор шахслар ва фуқаролар томо­нидан Ўзбекистон Республикасининг бутун ҳудудида ушбу Ко­декс ва бошқа қонунларда белгиланган тартибда ижро этилади.


1. Мамлакатимизда амалга оширилаётган ислоҳотлар суд тизимини ҳам четлаб ўтмаётганлиги ҳақида юқорида фикр юритган эдик. Суд органлари томонидан қабул қилинадиган қарорлар, агар ўз вақтида ижро этилмас экан, манфаатдор шахсларнинг қонуний ҳуқуқларини поймол бўлишига, бу ўз навбатида суд органларининг обрўсига путур етишига олиб келиши мумкин. Шу боисдан ҳам шарҳланаётган ушбу моддада қонуний кучга кирган суд қарорлари барча давлат органлари, ташкилотлар, мансабдор шахслар ва фуқаролар томонидан қонунда белгиланган тартибда ижро этилиши лозимлиги таъкидланган.
Ушбу бўлим “Суд қарорларининг ижроси” деб аталсада, бунда суддан ташқари фуқаролик ишлари юзасидан қарорлар чиқаришга ҳуқуқли бўлган бошқа органларнинг қарорларини ижро этиш тўғрисида ҳам сўз боради.
Одил судловни амалга ошириш мақсадида фуқаролар ва ташки­лотларнинг ҳуқуқларини қўриқлаш мақсадида чиқарилган қарор­ларнинг ижроси фуқаролик процессининг якунловчи босқичидир.
Суднинг ҳал қилув қарорлари, шунингдек фуқаролик ишлари тўғрисида бошқа органларнинг қарорлари одатда ихтиёрий равиш­да ижро этилади. Агар бундай қарорларни шахс (ёки шахслар) их­тиёрий равишда ижро этмасалар, суд қарори ФПКнинг 370-
385-моддалари ва суд қарорларини ижро этиш тартиби тўғрисидаги ҳуқуқий ҳужжатлар билан белгиланган тартибда ижро этилади. Амалдаги ФПК ижро этиш билан боғлиқ бўлган айрим ҳаракатлар суд фаолияти ва иш юритиш билан боғлиқ бўлмаганлиги ва улар­нинг аксарияти ижро фаолиятига тегишли бўлмаганлиги сабабли бу бўлим ўз кучини йўқотган ФПКга нисбатан бирмунча қисқартирил­ганлиги ва шу туфайли қатор ҳуқуқий нормалар суд ижрочисининг фаолиятида ўз аксини топиши белгиланган.
Булардан ташқари, ижро этиш тартиби 2001 йил 29 августда қабул қилинган “Суд ҳужжатлари ва бошқа органлар ҳужжатла­рини ижро этиш тўғрисида”ги Ўзбекистон Республикасининг Қону­ни ва бошқа қатор ҳуқуқий ҳужжатлар билан тартибга солинади.