Ўзбекистон республикаси адлия вазирлиги тошкент давлат юридик институти шорахметов шоакбар шорустамович

297³-м о д д а. Суднинг ҳал қилув қарори


Суднинг аризани қаноатлантириш тўғрисидаги ҳал қилув қарори тегишинча шахсни психиатрия стационарига ғайриих­тиёрий тартибда ётқизиш ёки унинг стационарда ётиши муд­датини узайтириш учун асос ҳисобланади.


1. Шахсни ғайриихтиёрий тартибда психиатрия стационарида ётқизиш тўғрисидаги ёки стационарда ётиш муддатини узайтириш тўғрисидаги аризани суд ўн кун муддат ичида кўриб чиққанидан кейин аризани рад этиш ёки қаноатлантириш тўғрисидаги ҳал қилув қарорини чиқаради.
Суднинг ғайриихтиёрий тартибда психиатрия стационарига ётқизиш тўғрисидаги аризани қаноатлантириш бўйича қабул қил­ган ҳал қилув қарори руҳий касалликка чалинган шахсни даволаш, мақсадида стационарга ётқизиш учун ёки даволанаётган шахсни даволаш муддатини янада узайтириш учун асос бўлади.
Бундай турдаги ишлар бўйича суд томонидан чиқариладиган ҳал қилув қарори ФПКнинг 203-206-моддаларида кўрсатилган қоидаларга амал қилган ҳолда чиқарилади, бироқ суд унинг ўзига хос хусусиятларини инобатга олиши лозим. Суднинг бу ҳақдаги ҳал қилув қарорини асослантириш ва хулоса қисмларида шахснинг ғайриихтиёрий тартибда руҳий даволаш стационарига ётқизиш учун қандай асослар мавжуд эканлиги, иш учун зарур бўлган руҳий даволаш муассасаларининг мутахассислар томонидан берилган хулосаси таҳлил қилинган бўлиши талаб этилади. Суднинг шахсни ғайриихтиёрий тартибда психиатрия стационарига ётқизиш ёки уни муддатини узайтириш тўғрисида чиқарадиган ҳал қилув қарори қонуний бўлиши (иш моддий ҳуқуқий нормалар билан мустаҳкам­ланиши), шунингдек юқорида баён қилинганидек далиллар билан асослантирилган бўлиши лозим, акс ҳолда ҳал қилув қарори юқори судлар томонидан бекор қилинишига асос бўлади.


34-боб. МОЛ-МУЛКНИ (АШЁНИ) ЭГАСИЗ ДЕБ ТОПИШ


298-м о д д а. Аpиза беpиш


Мол-мулкни (ашёни) эгасиз деб топиш ҳақидаги аpиза молия органи ёки бошқа ваколатли орган томонидан мол-мулк (ашё) туpган жойдаги судга беpилади.