Ўзбекистан темир йўллари

«___ перегондаги автоблокировка ишламаяпти. №____поезд _____ станциясидан жўнаши ва ______ станциясининг кириш светофоригача ҳаракатланиши, сўнг ушбу светофорнинг кўрсатмаларига биноан ҳаракатланишига рухсат этилади. ДНЦ ____».


Бундай ҳолатларда автоблокировкани ёпиш тўғрисидаги диспетчернинг буйруғи фақатгина навбатчиси бор станцияларга узатилади. Автоблокировка ёпилгандан сўнг ушбу станцияда поездлар йўл хатлари (қоғозлари) бўйича жўнатилади, бунда поездлар бир йўллик перегонларга ёки икки йўлли перегоннинг икки томонлама блокировкали нотўғри йўлига жўнатилганида йўл хати (қоғози) фақат станция навбатчиси томонидан диспетчернинг қуйидаги шаклдаги қайд этилувчи буйруғини олгандан сўнг берилиши мумкин:


«________ перегон (________ перегоннинг асосий йўли) поездлардан бўш. №____ поездни жўнатишга рухсат бераман. ДНЦ ____».


Ушбу буйруқ поезд телефонограммалари журналида қайд этилади.


43. Агар поезд бир неча ишчи локомотивлар ёки перегоннинг бошидан охиригача борадиган сурувчи локомотив билан ҳаракатланаётган бўлса, ёзма рухсатномалар фақат етакчи локомотивнинг машинистига тақдим этилади. Бошқа локомотивларнинг машинистлари етакчи локомотив машинистининг сигналларига амал қилиши шарт.

АВТОБЛОКИРОВКА АМАЛ ҚИЛИШИНИ ТЎХТАТИШ

44. Поезд диспетчерлик алоқаси узилган пайтда носозлик туфайли автоблокировка амал қилишини тўхтатиш ва телефон алоқаси воситаларига ўтиш қуйидаги тартибда амалга оширилади:

А. Бир йуллик перегонларда

Автоблокировка носозлигани аниқлаган станция навбатчиси, қўшни станция билан сўзлашувлар натижасида ва поездлар ҳаракати журналидаги ёзувлар бўйича перегоннинг бўшлигига ишонч ҳосил қилиб, қўшни станцияга поезд телефонограммасини узатади:


«_____________станциялар орасидаги автоблокировка ишламаяпти. Сиз томондан охирги бўлиб № _________ поезд келди. Сиз томонга охирги бўлиб № ______ поезд жўнатилди. Телефон алоқасига ўтишингизни сўрайман. ДСП ___».


Қўшни станция навбатчиси ҳам ўз навбатида перегоннинг бўшлигига ишонч ҳосил қилиб қуйидагича жавоб беради: