Zamonaviy avtomobillarning shina va disklariga txk

Diskli g‘ildiraklarning tuzilishi. To‘g‘inning ichki qismi shakliga qarab diskli g‘ildiraklar ikkiga, ya’ni tekis to‘g‘inli va chuqur to‘g‘inli g‘ildiraklarga ajratiladi. Chuqur to‘g‘in yengil avtomobillar g‘ildiraklarida qo‘llaniladi. Chuqur to‘g‘inning o‘ziga xos tomoni shundan iboratki, to‘g‘inni o‘rta qismida botiqlik bo‘lib, u pokrishkani to‘g‘inga kiydirishni yengillashtirish uchun xizmat qiladi. Bunday to‘g‘inning qismlarga ajralmaydigan konstruksiyasi g‘ildirakni maksimal
darajada yengillashtirishga va soddalashtirishga imkon beradi. Ushbu g‘ildiraklarga, o‘lchamlari uncha katta bo‘lmagan shinalarni-engil avtomobil shinalarini o‘rnatish mumkin.
Tekis to‘g‘in yuk avtomobillarining g‘ildiraklarida bir necha xil variantlarga ega. Ko‘pincha, to‘g‘in chekkasi vazifasini bajaradigan qirqilmagan bort halqa ishlatiladigan variantdan foydalaniladi. Bu vaziyatda to‘g‘in disk bilan ajralmaydigan qilib payvandlangan va shina borti uchun yon devorli bita tokchaga ega, shina o‘tkaziladigan ikkinchi tokcha esa qirqilgan prujinasifat qulf halqaning ichki yuzasida hosil qilingan.
G’ildirakni yig‘ishda shina to‘g‘inga erkin kiydiriladi, bort halqa o‘rnatiladi va to‘g‘in ariqchasiga kesilgan qulf halqa tushirib qo‘yiladi, natijada bort halqa to‘g‘inga mahkam o‘rnashadi. Shina damlangandan so‘ng undagi havo bosimi shina bortlarini to‘g‘in chekkalariga va bort halqasiga zich siqilishini ta’minlaydi, qulf halqani to‘g‘in ariqchasiga tushirib berkitadi va shinaning to‘g‘inga zich o‘tirishiga erishiladi.
Tekis to‘g‘inli diskli g‘ildiraklarning boshqa konstruksiyalarida kesilgan bort halqa ishlatilib, u bir vaqtni o‘zida qulf halqa vazifasini ham bajaradi yoki bo‘lmasa tekis to‘g‘in ikki qismga ajraladigan qilib tayyorlanadi. Orqa ko‘prikka tushadigan yuklanishlarning kattaligi bois, yuk avtomobillarining orqa g‘ildiraklari qo‘shaloqdir. Bunda ichki g‘ildirak gupchakka shpilkalar hamda ichki va tashqi rezbasi bo‘lgan qalpoqsimo gaykalar bilan, tashqi g‘ildirak esa konusli gaykalar bilan qotirib qo‘yiladi.