Xx боб ҳомиладорлик давридаги гипертензив ҳолатлари

20.5. Профилактикаси
Ҳомиладорлик пайтидаги гипертензив ҳолатларнинг олдини олиш ҳозирги замонда мураккаб вазифалардан ҳисобланади, лекин шунга қарамай туғиш ёшидаги аёлларда соғломлаштириш ишларни олиб бориш мақсадга мувофиқдир. Айниқса экстрагенитал касалликлари бор аёлларга катта эътибор бериш зарур. Шу тариқа аёлларни ҳомиладорликдан ташқари вақтда синчиклаб текшириб режалаштирилган тарзда ҳомиладорликка тайёрлаш керак. Ҳомиладорлик давридаги гипертензив ҳолатлар кўпинча буйрак хасталигига, ҳафақонликка чалинган, эндокрин патологияси, юрак қон томир ва жигар касалликлари бор аёлларда ҳомиладорлик давридаги гипертензия ҳолати кўпроқ ривожланишини эътиборга олиб, ушбу аёлларда ҳомиладорлик давридаги гипертензия ҳолатининг илк белгиларини аниқлаш муҳим аҳамиятга эга.
Бундан ташқари, ҳомиладор аёл 18 ёшдан кичик ва 35 ёшдан катта бўлса ҳам ҳомиладорликни мунтазам кузатиш зарур. Юқорида кўрсатиб ўтган ҳомиладорлик давридаги гипертензия ҳолатига мойиллиги аниқланган аёлларга ҳомиладорлик пайтидаги гипертензия ҳолатини оғирлаштирувчи белгилар ҳақида маълумот бериш керак, чунки бу белгилар намоён бўлиши билан ҳомиладор туғруқхонага мурожаат қилиши оғир преэклампсия ва эклампсиядек ҳомиладорлик давридаги гипертензия ҳолатлари асоратларининг олдини олишга ёрдам беради.