Vitaminlarga xos sifat reaksiyalar

Metilen ko’ki bilan boradigan reaksiya
Askorbin kislotasi yorug`likda metilen ko’kini qaytarib, rangsiz birikmaga aylantiradi.

Reaktivlar: a) karam yoki kartoshkaning sharbati, b) 0,01 % li metilen ko’ki, v) 5% li natriy karbonat.
Ishning bajarilishi: 1 ml yangi ajratilgan karam yoki kartoshka sharbatiga 1-2 tomchi metilen ko’ki eritmasidan solinadi va ustiga 2-3 tomchi natiriy karbonatdan qo’shiladi. Probirka yengil qaynatiladi va natijada ko’k rangning yo’qolishi kuzatiladi.


Qizil qon tuzi bilan boradigan reaksiya
Askorbin kislotasi oksidlanib, qizil qon tuzini K₃Fe(CN)₆ sariq qon tuzigacha K₄Fe(CN)₆ qaytaradi. Bunda 3 valentli temir ionlari ishtirokida kislotali muhitda berlin lazuri Fe₄ (Fe(CN)₆)₃ hosil bo’ladi.

Reaktivlar: a) karom yoki kartoshkaning sharbati, b) qizil qon tuzining 5% li eritmasi, v) kaliy ishqorining 5% li eritmasi, g) 10% xlorid kislota, d) 1% li temir xlorid.
Ishning bajarilishi: 1 ml karom yoki kartoshka sharbatiga 2 tomchi kaliy ishqori eritmasidan va shuncha miqdorda qizil qon tuzidan solinadi. Probirka yaxshilab chayqatiladi. Keyin 6-8 tomchi 10% li xlorid kislotasidan va 1-2 tomchi temir xlorid solinadi. Natijada berlin lazerining ko’k yoki yashil-ko’k rangli cho’kmasi hosil bo’ladi.


Vitamin B₂ (riboflavin) ga xos sifat reaksiyalari
Vitamin B₂ organizmda ketadigan oksidlanish-qaytarilish jarayonlarida ishtirok etuvchi hisoblanadi. U vodorod uzatilish jarayonida ishtirok etadigan oksidlanish-qaytarilish fermentlarining aktiv guruhlari tarkibiga kiradi. Shu bilan birga oqsil moddalarining almashinishi bilan mahkam bog`langan.
Riboflavin ninasimon kristall bo’lib, qizg`ish-sariq rangli bo’ladi. Suvda, etil spirtida piridinda, siklogeksanda yomon eriydi xloroformda, atsetonda, benzolda umuman erimaydi. Riboflavin yuqori haroratga chidamli.
Vitamin B₂ molekulasining asosi dimetilizoalloksazanni ribitol spirtining qoldig`i bilan bog`lanishidan hosil bo’lgan. Shuning uchun riboflavinni 6,7-dimetil- 9-(1-d-ribitol)-izoalloksazan deb atash mumkin.

Riboflavin o’simlik va hayvon maxsulotlarida bo’ladi. Bu vitaminga odam organizmining ehtiyoji energiya sarfiga va ovqat tarkibidagi oqsilning miqdoriga bog`liq. Riboflavinga bo’lgan sutkalik ehtiyoj katta odamlarda 2,5-3,5 mg ni tashkil etadi. Bu ko’rsatkich mehnatning turiga va organizmning fiziologik holatiga qarab belgilanadi. Yosh bolalarning ehtiyoji 3,0 mg ni, o’smirlar uchun esa (16-22 yoshgacha) 3,5 ni tashkil etadi.