Veterinariya virusologiyasi

Virusologiya laboratoriyasida ishlash tartibi

Laboratoriyaning barcha xodimlari mehnat xavfsizligiga doir instruktaj o‘tkazilib, talabga javob beradigan normaga asosan sanitariya himoya vositalari, maxsus oyoq kiyimi va maxsus kiyim bilan ta’minlanadi.
Virusologiya laboratoriyasining asosiy ish qoidalari quyidagilar:
1.Ishlab chiqarish binosiga begona kishilarning, hamda laboratoriya xodimlarining xalatsiz va maxsus oyoq kiyimisiz kirishi mumkin emas;
2.Laboratoriyadan tashqariga xalatda va maxsus oyoq kiyimida chiqish yoki xalat ustidan kiyim kiyish, chekish, ishlab chiqarish binosida ovqatlanish va oziq-ovqat mahsulotlarini saqlash taqiqlanadi.
Xodim boksda steril xalatda, yuz yopqichda, shippakda, zarur bo‘lgan taqdirda rezina qo‘lqopda va ko‘zoynak taqib ishlaydi. Oyoq kiyim albatta almashtiriladi. Ish vaqtida so‘zlashishga, yurishga yo‘l qo‘yilmaydi;
3.Laboratoriyaga tekshirish uchun olib kelingan barcha materialda infeksiya bor deb qaraladi. Infeksiya bor deb qaralgan material bilan ishlashda juda ehtiyot bo‘lib ish ko‘riladi, bankalarni ochayotgan paytda, tashqi tomonidan dezinfeksiyalovchi material surkalib, tagiga kyuveta qo‘yiladi;
Bir necha qavat doka 5% xloramin eritmasi bilan namlanib ish stolining ustiga yopib qo‘yiladi.
Virus saqlovchi suyuqliklarni quyish, dezinfeksiyalovchi eritma solingan kyuveta ustida bajariladi.
Pipetkalar bilan ishlashda rezina nokchalardan foydalaniladi. Oldin ishlatilgan pipetka, buyum va yopqich oynalar 5% xloramin eritmasi, fenol, lizol yoki sulfat kislotaga botirish yo‘li bilan zararsizlantiriladi.
O‘z joyida oldindan dezinfeksiya qilinmasdan turib laboratoriya jihozlari, inventarlar, materiallar va boshqa narsalarni laboratoriyadan tashqariga olib chiqish taqiqlanadi;
4.Ish tugagandan so‘ng ish joyi tartibga keltirilib, so‘ngra to‘lasincha dezinfeksiyalanadi. Kelajakda kerak bo‘ladigan virus saqlovchi material saqlash uchun muhrlanib muzlatgichga qo‘yiladi;
5.Yuqumli materialni saqlovchi idishlarga mustahkam belgi qo‘yilishi muhim ahamiyatga ega. Qo‘lga kiyilgan qo‘lqopni 5% xloramin eritmasi bilan yuvilib, so‘ngra qo‘lqop yechiladi, ikkinchi bor dezinfeksiyalanadi va yuviladi.
Yuqumli material xalatga, qo‘lga, stolga, oyoq kiyimi va boshqalarga tushsa unda laboratoriya mudiriga (o‘quv yurtlarida o‘qituvchiga) xabar berilib, zudlik bilan uning nazorati ostida dezinfeksiya ishlari o‘tkaziladi. Agarda infeksiya yuqqan deb gumonsiralsa, vrachga murojaat qilinadi.
Virusologiya laboratoriyasida ishlash jarayonida barcha xodimlar aseptika va antiseptika qoidalariga qat’iy rioya qilishlari kerak.