«ветеринария» ихтисослиги бўйича олий ўҚув юртлари учун қЎлланма ички юқумсиз касалликлар фанидан

Гемотерапия - носпецифик стимулловчи терапия усулларидан бири бўлиб, қон зардоби билан даволашга нисбатан кенгроқ таъсирга эга. Чунки бунда қон зардоби оқсилларининг парчаланиш маҳсулотларидан ташқари, организмга фибрин, эритроцит ва лейкоцитларнинг аутолизи маҳсулотлари ҳам стимулловчи таъсир кўрсатади.
Аутогемотерапияда бундан ташқари касал ҳайвоннинг қонида бўладиган бактериялар ёки заҳарли моддалар ҳам таъсир этади. Агар аутоқон тенг миқдорда новокаиннинг 4%-ли эритмаси билан аралаштирилиб юборилса, биринчи даврдаги реактивлик ҳолати кузатилмайди. Катта ҳайвонларга аутоқон аввал 25 мл, кейин 30, 40 ва 50 мл гача юборилади. Бузоқларга 0,1-0,2 мл/кг ҳисобида юборилади.
Гетероген яъни бошқа турга мансуб ҳайвон қони ва шу турга мансуб бошқа ҳайвон қони (изоген қон) 1%-ли хлорамин эритмаси билан 3:1 нисбатда аралаштирилиб юборилганда анафилактик шокнинг олди олинади. Қоннинг ивиб қолишини олдини олиш мақсадида 4%-ли цитрат натрий билан 10:1 нисбатда аралаштирилади.
Юрак-қон томир етишмовчиликлари, ички аъзолардаги ўткир яллиғланиш жараёнлари, менингит, энцефалит ва ўткир юқумли касалликлар пайтида гемотерапия тавсия этилмайди.
Гистолизатотерапия - соғлом ҳайвон тўқималарини кислоталар, ишқорлар ёки тўқима ферментлари таъсирида эритиш, парчалаш йўли билан олинган препаратлардан фойдаланишдир. Бу усулнинг асосчиси М.П.Тушнов (1879-1935) ҳисобланади.
Гистолизатотерапияда асосан оқсилларнинг гидролизи маҳсулотларидан пептонлар, альбумозлар, полипептид ва аминокислоталар организмга умумий носпецифик стимулловчи таъсир кўрсатади ва шунингдек, специфик таъсири ҳам мавжуд. Масалан, овариолизат тухумдонлар ривожланишини жадаллаштиради.
Цитотоксинотерапияда организмга цитотоксинлар юбориш йўли билан биостимуляторлар ҳосил қилиш тушунилади. Ветеринария амалиётида АЦС (антитоксин зардоб) сурункали яллиғланишларини даволашда (бронхопневмония, плеврит, дерматит, тез битмайдиган яралар ва б.) қўлланилади. Цитотоксин зардоблар ҳайвонларни турли тўқима ёки аъзоларнинг хужайравий элементлари билан эмлаш ҳисобига олинади.