Ўқув қулланма Тошкент 2011 йил

HSS - Уй абонентлари сервери

HSS сервери абонентлар маълумотлари базаси бўлиб, абонентларга хизмат билан боғлиқ бўлган шахсий маълумотларига уланиш имконини беради. HSS серверида, шунингдек, MME модули сўровига жавоб бера оладиган, абонент ҳақидаги аниқ маълумотлардан ташкил топган маълумот базасидаги ҳолатини аниқлаб берадиган SLF (ингл. Subscription Locator Function) функцияси амалга оширилади. HSS сервери ўз ичига 2G тармоқлари архитектурасидан бизга маълум бўлган HLR ва AuC модуллари функцияларини қамраб олади. HSS сервери пакетли таянч тармоғига SS7 (УКС-7) асосида эмас, балки Diameter²⁵ протоколи асосидаги интерфейс ёрдамида уланади. Бу эса IP-тармоғининг бошқарув сатҳи учун унификацияланган ва соддароқ ечимни яратиш имконини беради, чунки тармоқ сигнализацияси учун сиёсатлар бошқаруви ва тарификация қоидалари Diametr протоколига асосланган.

PCRF – тарификация қоидаларини ва сиёсатларни қўллаш сервери

LTE тизимида PCRF сервери абонентларга талаб қилинадиган QoS даражасига мос келадиган ва «биллинг» тизимидан олинган қоидаларга асосланган тарификация хизматларини тақдим этишни бошқарув функцияларини бажаради. Бундай функцияларга: абонентнинг маълумот пакетлари оқимини аниқлаш ва рўйхатга олиш (рўйхатга олишда маълумот пакетлари оқими абонентнинг IP-протоколи идентификатори асосида талаб қилинган хизмат кўрсатиш сифати ва қабул қилувчи ва узатувчининг портлари ва IP-манзиллари билан таққослаштирилади); маълумотлар пакетини узатиш ҳажми ва параметрларини ўлчаш (тезлик ва жавоб кечикиш вақти); маълумот узатиш сифатини бошқариш ва уни ҳисобга олган ҳолда, реал вақт давомида тарификация қоидаларининг қўлланилиши ва бошқалар киради. Батафсилроқ 3.3.6. параграфда берилган.

GPRS ни қўллаб-қувватловчи хизмат тугуни – SGSN

SGSN шлюзи S-GW шлюзи билан биргаликда LTE ҳамда GSM/GPRS ва UMTS тармоқлари орасида ўзаро ҳамкорликни таъминлайди. Бунда, SGSN абонентни идентификация қилиш ва мобилликни бошқариш, IP-тармоқ протоколларини GPRS ва UMTS тармоқларида қўлланиладиган протоколларга ўзгартириш, абонент тўлови ҳамда абонент трафиги ҳақидаги маълумотларни йиғиш хамда бошқа ташқи тармоқларга уланганда маълумотларни маршрутлаш каби масалаларни ҳал қилади.