Устознинг энг буюк бурчи унинг халққа нафи тегадиган, ақл-идрокли, қобилиятли, уқувли шогирдлар тайёрлашдир

Суҳбат методи ҳам режалаштирилади. Суҳбат болаларга аввал эгаллаган билимлари билан янгисини боғлаш имконини яратади, шунингдек, янги билимларни ўзлаштириб олишларини енгиллаштиради. Тарбиячи машғулотларда фойдаланадиган сўзли методда унинг қийинлигини саволлар ташкил этади. саволларни болаларнинг билиш жараёнлари: сезги, идрок, тафаккурини фаоллаштирадиган қилиб тузиш керак. Саволлар болалардан ақлий зўр беришга, сабаб-натижаларни аниқлашга қаратилган бўлиши зарур.
Машғулотларда муаммоли вазиятлар яратиш ҳам боланинг фикрлаш фаолиятини кучайтиради, билимларни эгаллаб олишини енгиллаштиради, уларнинг фаҳм-фаросатли, мустақил фикрлайдиган бўлишига ёрдам беради.
Машғулотларда солиштириш усулидан фойдаланиш инсоннинг энг қимматбахо ақлий хазинаси бўлиб, у буюмларни яхшироқ ўрганиш ва тушунишга ёрдам беради.
Кичик гурухларда солиштириладиган буюмлар бир-иккитадан кўп бўлмайди. Тарбиячи солиштиришни қандай изчилликда олиб боришни ўзининг календарь режасида ёзиб қўяди.
Ўрта гуруҳда солиштиришга мўлжалланган буюмлардаги белгилар сони кўпаяди ва болалардан буюмларни кузатиб, улардаги белгиларни маълум изчилликда баён қилиш талаб этилади.
Катта ва мактабга тайёрлов гуруҳларидаги болалардан фақат улар кўриб турган буюмларнинг белгиларини санаш билан чегараланиб қолмай, уларни солиштиришда тасаввурларидан фойдаланиш ҳам талаб этилади.
Солиштиришнинг бу мураккаб шакли болаларнинг ёшига мос бўлиб, уларнинг ақлий ривожланишлари учун муҳим аҳамият касб этади.
Тарбиячи машғулотларда ўйин усулидан кенг фойдаланади. Ўйин усули машғулотнинг қизиқарлироқ, жозибалироқлигини таъминлайди, машғулот жараёнида юзага келадиган қийинчиликларни бола осонлик билан енгади.
Машғулот режасида болаларнинг хулқ-атвори, қизиқиши, ривожланиш даражасига қараб якка тартибдаги ишлар ҳам режалаштирилади. Умумий ривожланиши бироз орқада колаётган, диққати тарқоқ, ўзига ишончи йўқ ёки ўзи тўғрисида юқори фикрли болаларга кўпроқ эътибор бериш керак.
Шундай қилиб, календарь режага машғулотнинг дастур мазмуни, методик усул унга керакли кўргазма ва тарқатма материаллар, болалар билан индивидуал ишлаш режалаштирилади.