Umumiy va noorganik kimyo

LABORATORIYADA QO’LLANILADIGAN KIMYOVIY IDISHLAR VA ASBOBLAR.

Kimyoviy idishlar. Laboratoriya ishlarini bajarishda turli kimyoviy idishlar: probirka, stakan, voronka, konussimon, tagi yassi tubli va tagi yumaloq kolbalar, suyuqlikning hajmini o`lchash uchun menzurka, o`lchov kolbalari, o`lchov silindirlari, bir – biriga aralashmaydigan suyuqliklarni ajratish uchun ajratgich voronkalar va suyuqliklarni oz – ozdan qo`shish yoki tomizish uchun tomizg`ich voronkalar qo`llaniladi.

Laboratoriyada shisha idishlar bilan bir qatorda suyuqliklarni bug`latish uchun chinni kosacha, moddalarni qizdirish uchun chinni tigel va moddalarni maydalash uchun chinni hovonchlar, shuningdek, temir shtativlar ishlatiladi.

Qizdirish. Moddaning uchuvchan tarkibiy qismini yoki modda tarkibidagi kristallizatsion suvni yo`qotish, ba’zan esa reaksiya tezligini oshirish uchun modda qizdiriladi. Buning uchun spirt lampa yoki gaz yondirgich, suv yoki qum hammomi, mufel pechi va boshqa xil qizdirish yoki isitish asboblaridan foydalaniladi.

Moddani qizdirish uchun u tegishli idishga solinadi va to`g`ridan – to`g`ri ochiq alangada yoki asbest to`shalgan sim to`r ustida qizdiriladi. Qizdirilgan issiq tigel va kosachalarni maxsus tigel qisqich yordamida ushlash kerak.