Umumiy va noorganik kimyo

TAROZILAR VA ULARDAN FOYDALANISH.

Laboratoriyada uch xil tarozidan foydalaniladi: Texnik tarozi. Texnik – kimyoviy tarozi. Analitik tarozi. Moddani 0,1 – 0,2 g ortiq kami bilan tortish mumkin bo`lsa texnik tarozidan, ancha aniq (0,01 g gacha) tortish talab qilinsa texnik – kimyoviy tarozidan, katta aniqlik bilan (0,0001 g gacha) tortish talab qilinsa analitik tarozidan foydalaniladi.

Texnik – kimyoviy tarozi bo`lmasa, massasi 100 g gacha yukni tortish uchun apteka tarozisidan ham foydalaniladi.

Texnik – kimyoviy va analitik tarozilarda ma’lum bir umumiy massaga ega yirik va mayda toshlar to`plami, toshlarni olish hamda o`z o`rniga qo`yish uchun pinset solingan maxsus quticha bo`ladi.

Texnik – kimyoviy tarozilarda quyidagi qoidalarga amal qilishingiz lozim bo`ladi:

Tarozida tortishdan oldin uning to`g`ri ishlash ishlamasligini (pallalarning muvozanatini) va tarozi toshlarining bor yo`qligini tekshirib ko`ring. Buning uchun arretir dastasini o`ng tomonga sekin burab, strelka harakatini kuzating. Agar tarozi muvozanat holatga kelmasa, shovunga qarab taxta taglikning gorizontal holatda turgan – turmaganligini aniqlang. Kerak bo`lsa, shayin uchidagi posangini biror tomonga burab tarozini to`g`rilang.

Tarozida tortiladigan buyum yoki moddani to`g`ridan – to`g`ri tarozi pallasiga qo`ymasdan, uni stakancha, soat oynasi yoki qog`ozga solib torting.

Tarozi pallasiga issiq, ho`l va iflos narsalarni qo`ymang.

Tarozining chap pallasiga tortiladigan moddani, o`ng pallasiga tortilayotgan moddaning massasini ko`z bilan mo`ljallab, pinset bilan oldin katta toshlarni, so`ngra kichik toshlarni qo`ying.

Bitta tajribaga tegishli bo`lgan tortishlarni faqat bitta tarozidan va shu taroziga tegishli bo`lgan toshlardan foydalanib bajaring.

Toshlarning massasini hisoblang va 0,01 g aniqlik bilan topilgan qiymatni laboratoriya jurnaliga yozing.

Tortib bo`lganingizdan keyin tarozida hech narsani qoldirmang. Tarozi toshlarini pinset bilan olib, qutichadagi o`z joyiga qo`ying.

Toshlarni tarozi pallasidan olishda tortilgan modda massasining to`g`ri hisoblanganligini yana bir marta tekshirib ko`ring.