Учебное пособие по предмету «Каракалпакский язык» написано и утверждено на основе учебного плана и рабочей программы. Учебное пособие предназначено для студентов высших учебных заведений, обучающихся по специальности на узбекском языке

11.4. Tekstti oqıp, ózińizdiń joqarıdaǵı tapsırma boyınsha jazǵan maqalalarıńızdı salıstırıń.
Erteńimizge tiykar jaratılmaqta
J aqında usı gazetada bir jurnalist apamızdıń bizlerdiń dáwirimizde jarıslar, tańlawlar ótkerilmegenlikten balalıǵımızda kópshiliktiń aldına shıǵıp sóylew qábiletimiz tómen edi, búgingi mektep oqıwshılarına háwesim keledi, – degen mazmundaǵı maqalasın oqıp, ózimniń balalıǵım yadıma tústi. Haqıyqatında da, mektepte alǵan bilimlerimizdi bekkemlewde tańlawlardıń, jarıslardıń áhmiyeti óz aldına eken. Usı waqıtqa shekem qansha bilim iyelep, tabısqa erisken bolsam, ǵárezsizliktiń sharapatı ekenligin oy eleginen ótkerip, bunday zamanda, jaslar ushın imkaniyatlar esigi ayqara ashılǵan mámlekettiń perzenti ekenligime quwandım.
Meniń 4 – klassta oqıp júrgenimde respublikalıq gazetalarǵa maqala hám gúrrińlerim járiyalana baslaǵan bolsa, mektepti pitkeremen degenshe qatarlarım menen men qatnaspaǵan tańlaw, jarıs, olimpiadalar qalǵan joq. Olardaǵı jeńislerim ózime bolǵan isenimdi bekkemlep, alǵa umtılǵanman. Mámleketimizde hár bir oqıwshı ushın usınday imkaniyat barlıǵınan qanshadan – qansha talant kózleri ashılıp, qansha jaslar jáhán arenalarına shıqpaqta.
Bul kóterińki gápler emes. Bir jetiskenligim ekinshisine talpındırǵan ózimniń mısalımda – aq alıp qarayıq. Taraw tańlamay, meyli ol bilimler sınaǵı ma, sport pa, ádebiyat pa, ekologiya ma, watan, milliy qádiriyatlar baǵdarında ma, tańlawlarda shıńlanıp, ózimdi «otqa da, suwǵa da» urıp júrip, 19 jasımda eki kitabımnıń jarıq kóriwi, Zulfiya atındaǵı mámleketlik sıylıqqa iye bolıwım talanttıń qádirleniwi emes pe?! Sol sebepli, Ózbekstan mámleketlik jáhán tilleri universitetine test sınaqlarısız qabıl etiliwim, sońınan usı fakultettiń magistraturasın tamamlawım umtılǵan jaslardı qollap – quwatlawdıń bir ǵana kórinisi ekeni anıq.
Talantlı, umtılıwshań jaslar qay jerde de óz ornın tabadı. «Kamolot» JJH universitet baslanǵısh shólkeminde «Talantlı studentler menen islesiw» bólimi Keńesiniń baslıǵı, universitetke qabıllanǵan jıldan baslap hárekettiń fakultet jetekshisi, ÓzXDP Oraylıq Keńesi janındaǵı «Jas siyasatshılar» klubı koordinatorı boldım. Hátte jazǵı dem alısqa kelgenimde Qaraqalpaqstan telekanalında jigirmaǵa jaqın kórsetiwlerdi efirge uzattım, jaslar haqqında avtorlıq kórsetiwler tayarladım.
Studentlik dáwirimdi eń tabıslı jıllardıń biri boldı desem qátelespeymen. Túrli tańlawlardıń mámleket kólemindegi basqıshlarında «Eng mahoratli notiq», «Eng bilimdon debatyor», «Eng faol shijoatli debatyor» dep tabıldım, media – konferentsiyalarda jeńimpaz atandım. Ózbekstan ekojurnalistika tańlawında internet jónelisi boyınsha birinshi orın jeńimpazı boldım. 2013 – jılı Germaniya geologiya ilim – izertlew institutınıń grantın jeńip alıp, Germaniyada bir ay oqıp qayttım.
Bul tabıslarım itibarsız qalmadı. Prezidentimizdiń jas dóretiwshilerdiń kitapların biypul baspadan shıǵarıw haqqındaǵı pármanına bola Ózbekstan Jazıwshılar awqamı hám hayal – qızlar komitetiniń járdeminde «Jamǵırlar» atlı úshinshi prozalıq kitabım, 2012 – jılı «Qaraqalpaqstan onlayn jurnalistikası: qáliplesiw hám rawajlanıw ózgeshelikleri» atlı ilimiy – metodikalıq qollanbam jarıq kórdi.
Házirgi waqıtta «Qaraqalpaqstan internet jurnalistikası: qáliplesiw hám rawajlanıw basqıshları» temasında ilimiy izlenis alıp barmaqtaman. Usı waqıtqa shekem eliwden aslam maqalalarım respublikamızdan tısqarı Germaniya, Rossiya, Qazaqstan ilimiy jurnalları hám toplamlarında basılıp shıqtı. Miynetlerimniń nátiyjesinde Nawayı atındaǵı mámleketlik, 2014 – 2015 – oqıw jılında Ózbekstan Prezidenti stipendiantı boldım.
2011 – jıldan berli «Turkiston» gazetasınıń xabarshısı bolıp islep kiyatırman. Sonday – aq, studentlik jıllarımda «Hurriyat», «O’zbekiston ovozi», «Oila va jamiyat», «Marifat», «O’zbekiston adabiyoti va sanati» hám basqa da respublikalıq gazetalarda 200 den aslam maqalalarım, jaqında «Ámiwdárya» jurnalında «Suwdaǵı suw perisi» atlı povestim jarıq kórdi.
Bulardı maqtanıw ushın emes, ápiwayı awıl qızınıń mámleketimizde jaratılǵan imkaniyatlardan qalay paydalanǵanın, bilim alaman, izlenemen, dóretiwshilik penen shuǵıllanaman degen haqıyqıy talant iyeleri hár qashan qollap – quwatlanatuǵının ayqın mısal etip kórsetkim keldi. (Qumar Begniyazova. Zulfiya atındaǵı mámleketlik sıylıqtıń laureatı).