У. В.Ғафуров, Ш. И. Мустафақулов, М. Ш. Бўтабоев “Ўзбекистоннинг ижтимоий-иқтисодий ривожланиш стратегияси” фанининг ЎҚув-услубий мажмуаси

Фаннинг ўқув режадаги бошқа фанлар билан ўзаро боғлиқлиги ва
услубий жиҳатдан узвий кетма-кетлиги
“Ўзбекистоннинг ижтимоий-иқтисодий ривожланиш стратегияси” фани мутахассислик фанлари блоки таркибида бўлган танлов фани ҳисобланиб, ўқув режага мувофиқ ўқув йилининг 2-семестрида ўқитилади. Ўқув дастурида белгиланган мавзуларни тўлиқ ўзлаштириш ва билимларни мантиқий кетма-кетликда тўғри эгаллаш асносида ушбу фан мутахассислик ўқув режасидаги бошқа фанлар, хусусан, “Ўзбекистон Республикаси бюджет солиқ тизими”, “Инвестиция сиёсати”, “Халқаро молия бозори ва институтлари”, “Давлат молиясини бошқариш”, “Антимонопол сиёсат ва нархларни бошқариш”, “Макроиқтисодий сиёсат фанлари билан узвий боғлиқ.


Фаннинг ишлаб чиқаришдаги ўрни
Ушбу фан ишлаб чиқариш ва ижтимоий соҳа билан чамбарчас боғлиқдир. Ижитмоий-иқтисодий сиёсат ҳар бир давлатнинг миллий иқтисодий сиёсатини белгилаб берадиган, шу билан бирга, иқтисодиёт ва молия секторларининг узвий боғлиқлигини таъминлаш, модернизациялаш шароитида ишлаб чиқаришни ташкил этиш ва бошқаришнинг самарали усулларини жорий этиш, иқтисодий хавфсизликни таъминлашда монополиялар фаолиятини тартибга солиш хусусиятини, иқтисодий танлов қоидасини ва ишлаб чиқариш омиллари асосида унинг натижаларини асослашни, турли мукчилик шаклида инвестицияларни жалб этишни ташкил этиш ва улар фаолиятини бошқариш, таркибий ўзгаришлардан кутилаётган натижани англаб етиш, бизнес, тадбиркорлик ва рақобатни ривожлантириш тамойилларини ўрганиш ва уларга амал қилиш қоидаларини белгилаб беришни, рақобатлашган ва рақобатлашмаган бозорларда фаолият юритаётган фирмалар, компанияларнинг барқарор ривожланишини таъминлашга хизмат қилади.
Жаҳон молиявий-иқтисодий инқирози ҳукм сураётган ҳозирги шароитда миллий иқтисодиётнинг ривожланиш стратегиясини ишлаб чиқиш, бозорни тартибга солиш, нархларни бошқариш ва монополияга қарши сиёсатни тўғри йўлга қўйиш ва бунинг натижасида мамлакатда соғлом рақобат муҳитини шакллантириш, истеъмолчилар ҳамда ишлаб чиқарувчилар (хизмат кўрсатувчилар) манфаатларини ҳимоя қилиш, аҳолининг фаровонлигини таъминлашга хизмат қиладиган: миллий даромадни ошириш, ишсизликни камайтириш, янги иш ўринларини кўпайтириш, инвестициялар ҳажмини ошириш, қаттиқ пул-кредит сиёсатини олиб бориш орқали инфляцияни пасайтириш, ижтимоий муаммоларни бартараф этиш, бандликка кўмаклашиш орқали ишсизликни пасайтириш каби қатор тизимий ишлар давлат бошқарувининг муҳим вазифаларидан ҳисобланади.