|
Бу касаллик 1817 йил ингилиз шифокори Паркинсон (унинг ўзи ва оила аъзолари хасталанганлар) томонидан қайд этилган. Эркаклар аёлларга нисбатан 2 марта кўпроқ дучор бўладилар. Сурункали хасталик бўлиб, мушаклар тонусининг кескин ортиши, титраш ва ҳаракат танглиги (акинезиялар) билан кечади. Сўлак ва тери ёғ безлари функцияси ортиб кетади. Касалликнинг этиологияси номаълум. Бу хасталикда экстрапирамид система ядролари жароҳатланади, яъни неостриатумга тормозловчи таъсир этувчи, базал ядро ва қора субстанцияда дофамин миқдори камаяди. Неостриатум эса орқа мия функциясини бошқаришда қатнашади. Дофаминергик тормозловчи таъсирнинг камайиши, думли ядро холинэргик нейронларининг қўзғатувчи таъсирини ошириб юборади. Шу билан бир қаторда глутаматергик нейронларнинг стимулловчи таъсири устунлик қилади. Шу туфайли мушакларда ўзгаришлар юзага чиқади. Демак, паркинсон хасталигини даволаш учун МНС да дофаминергик таъсирни ошириш керак ёки холинергик таъсирни сусайтириш мақсадга мувофиқдир. Бу мақсадда дофаминни ишлатиб бўлмайди, чунки у гематоэнцефалик барьердан ўтмайди. Шунинг учун L– ДОФА (леводопа) ни қўлланилади, чунки у организмда ГЭБ дан яхши ўтади ва дофа декарбоксилаза ферменти таъсирида дофаминга айланади. Дофаминэргик система фаоллигини, дофамин рецепторларини стимуллаш ёки дофаминни нейронал ютилишини сусайтириш хисобига кучайтириш мумкин. Паркинсонизмга қарши ҳозирги замон дори воситалари 3 гуруҳга бўлинади:
Дофаминэргик таъсирни кучайтирувчи моддалар
дофамин ҳосил бўлиш манбаси (леводопа)
дофамин рецепторларини стимулловчи моддалар (бромкриптин)
моноаминооксидаза В ни блокловчи моддалар(селегилин)
Глутаматергик таъсирини сусайтирувчи моддалар(мидантан)
Холинергик таъсирни кучайтирувчи моддалар (циклодол)
ЛЕВОДОПА (L-ДОФА)-диоксифенилаланининг чапга айлантирувчи, изомери бўлиб, ундан ДОФА декарбоксилаза ферменти таъсирида дофамин ҳосил бўлади. Леводопа Паркинсон хасталигини даволашда энг самарадор ҳисобланади, чунки унинг белгиларини камайтиради: акинезияни кучли даражада бартараф этади, лекин тарангликга камроқ ва титрашга энг кам таъсир этади. Даволаш узоқ давом этади, таъсири бир ва ундан кўп ҳафтадан кейин бошланиб, 1-2 ойдан кейин яхши натижа беради. Бунда аста-секин препарат дозасини ошириб бориш керак. МИТ дан леводопа яхши сўрилади. Лекин периферик тўқмаларида ҳам дофаминга айланади ва шунинг ҳисобига кўп нохуш таъсирлар келтириб чиқаради: иштахани бузилиши, диспепсия, ортостатик гипотензия, руҳий бузилишлар, юрак аритмияси. Периферик таъсирни камайтириш мақсадида леводопани ДОФА-декарбоксилаза ферментининг ингибитори карбидопа ёки бенсеразид билан бирга қўллаш мумкин. Бу фермент ингибиторлари ГЭБ дан ўтмайдилар ва леводопадан дофаминни бош мияда ҳосил бўлишига таъсир этмай, периферик тўқималарда дофамин ҳосил бўлишига тўсқинлик қиладилар.
НАКОМ-(таб.) таркибида 0, 25 леводопа + 0, 025 карбидопа.
МАДОПАР-(касп.) таркибида 0, 05 леводопа+0,0125 бенсеразид
Мадопар – 125 – (0, 1 леводопа + 0, 025 бенсеразид)
Мадопар – 250 –(0, 2 леводопа + 0, 050 бенсеразид)
Бу иккала препаратни қўллаганда, МНСга кирувчи леводопа миқдори ортади, нохуш таъсири камаяди. Витамин В6 (пиридоксин) леводопа фаоллигини пасайтиради.Юрак қон томир, жигар, буйрак ва руҳий хасталикларда леводопа ишлатиш мумкин эмас.
МИДАНТАН- NМDА-глутамат рецепторларини блоклаб, кортикал глутамат нейронларини, неостриатумга стимулловчи таъсирини сусайтиради. Қора субстанция нейронларига нейропротекторлик таъсир кўрсатади, чунки ҳужайраларга кальций ионини киришини камайтиради(деструкцияга қаршилик қилади). Бундан ташқари МНСнинг мотор нейронларида импульслар ҳосил бўлишини сусайтиради. Мидантан аввал вирусга қарши восита сифатида тавсия этилади. Мидантан кўпроқ акинезияни камайтиради, камроқ мушаклар таранглигини сусайтиради, титрашга умуман таъсир этмайди. лекин препаратнинг таъсири леводопаникидан анча илгари бошланади (1 - 2 кундан кейин). Бир неча кундан кейин ривожланиш чўққисига етади. Яъни мидатан тез таъсир этувчи препарат ҳисобланади. Уни паркинсон хасталигида қўлланиладиган бошқа препаратлар билан (холинолитик, L-ДОФА) биргаликда қўллаш мумкин. Мидантанни беморлар яхши қабул қиладилар. Баъзан бош оғриғи, ортостатик гипотензия, галлюцинация, уйқусизлик, умумий холсизлик, диспепсия, бош айланиш кузатилади.
Қўллаш мумкин эмас: жигарнинг ўткир ва сурункали хасталикларида, буйрак етишмовчилигида, ҳомиладорликда, тиреотоксикозада, тутқаноқда, руҳий хасталикларда.
БРОМОКРИПТИН- қора муғ алкалоиди-эргокриптиннинг ярим синтетик унуми бўлиб, D2 дофамин рецепторлари (дофаминмиметик) специфик агонисти (кучайтирувчи)дир. Дофамин ва НАнинг МНСда алмашинувига фаол таъсир этади, апоморфин каби, серотонинни ажралишини камайтиради,. Бромкриптин қайт қилишни қўзғатади, тана ҳароратини пасайтиради, фенотиазин унумлари ва резерпин таъсирида юзага келган акинезия (ҳаракат танглигини)ни камайтиради. Қонда катехоламинлар миқдорини пасайтиради, томирлар силлиқ мушакларини бўшаштиради, қон босимини пасайтиради. Бачадон мушакларини бўшаштиради. Гипофизнинг олдинги қисмидан пролактин ва самототропинни секрециясини камайтиради. Бромокриптин Д2-дофамин рецепторларини қўғатувчи таъсири туфайли, паркинсонизмни даволашда қўлланилади. Беморлар бу дориларни яхши қабул қиладилар. МИТдан яхши сўрилади. Асосан нажас таркибида ажралади. Пешоб таркибида жуда кам. Т½=3-6 соат.
Нохуш таъсири: кўнгил айнаш, қайт қилиш, қабзият, қон босимини пасайиши, шиллиқ қаватларнинг шиши. Седатив таъсири учун транспорт ҳайдовчилар ва операторларга бериш мумкин эмас. Бромокриптин қабул қилган беморларда контрацептив воситаларни, МАО ингибиторларини, МНСга сусайтирувчи воситаларни қўллаш мумкин эмас.
СЕЛЕГИЛИН- фақат В-типли МАО нинг фаоллигини сусайтирувчи хусусиятга эга. Кимёвий тузилиши бўйича эфедринга ўхшаш.
Таъсир механизми: бош мияда В-типдаги МАО кўп бўлганлигидан унинг фаоллигини сусайиши, мия тўқимасида моноаминлар, шу жумладан дофамин миқдорини, тарғил танада оширади. Селегилинни леводопа билан биргаликда қўллаганда, дофамин миқдори, айниқса экстрпирамид система нейронларида ошади. Селегилин леводопа таъсирини бошланишини тезлаштиради ва унинг таъсир давомлигини узайтиради. Шунинг учун ҳам, бу 2 препарат кўпинча биргаликда қўлланилади. Бунда ёғ алмашинувининг кўрсатгичларини ҳам яхшилайди: (селегилин + мадопар: селегилин + наком).
Нохуш таъсири: леводопа ёки накомга ўхшаш бўлади.
ЦИКЛОДОЛ- периферик ва МНСнинг М- ва Н-холенорецепторларини кучли даражада қамал қилади ва шу туфайли базал ганглияларга холиноергик стимулловчи таъсирини камйтиради, титрашни камайтиради, мушакларнинг таранлигига ва акинезияга кам таъсир этади, сўлак ажралишини камайтиради, лекин терлаш ва теридан ёғ ажралишига кам таъсир кўрсатади. Спазмолитик атропинсимон таъсирга эга. МИТдан яхши сўрилади, организмдан тез чиқарилади, кумуляция кузатилмайди. Холиноблокаторларга хос бўлган нохуш таъсирлари кўп (қабзият, тахикардия, МИТ аъзоларининг атонияси, аккомодациянинг бузилиши). Глаукомада қўллаш мумкин эмас.
Do'stlaringiz bilan baham: |
