Тошкент педиатрия тиббиёт институти абдурахимов зохид абдувасикович

Диссертация мавзусининг диссертация бажарилган олий таълим муассасасининг илмий-тадқиқот ишлари режалари билан боғлиқлиги. Диссертация тадқиқоти Ўзбекистон Республикаси Фан ва технологияларни жорий этишни мувофиқлаштириш қўмитасининг Соғлиқни сақлаш ва статистика институтининг ИЗ–2014-0915172705-сонли «Соғлом турмуш тарзини шакллантириш (СТТШ) бўйича жамоат тренерлари фаолиятини мувофиқлаштириш ва мониторинг қилиш тизимини ишлаб чиқиш ҳамда амалга ошириш» инновацион гранти, шунингдек, нодавлат нотижорат ташкилотларни қўллаб-қувватлаш бўйича Жамоат фонди томонидан ажратилган нодавлат нотижорат ташкилотларни қўллаб-қувватлаш бўйича 28-01/003-56-сон «Врачлар ва оила аъзоларининг саломатлик профилактикаси бўйича билимларини ошириш» ҳамда Ўзбекистон Республикаси Олий Мажлис ҳузуридаги фуқаролик жамияти бошқа институтларининг 28-05/050-27-сон «Ўзбекистон Республикасида бирламчи тиббий-санитар ёрдам (БТСЁ)нинг ривожланишига кўмаклашиш» грант лойиҳалари доирасида бажарилган.
Тадқиқотнинг мақсади Ўзбекистон Республикасида масофавий таълим усулларини ривожлантириш ва уларнинг тиббий хизмат сифатига таъсири ҳамда иқтисодий ва ижтимоий самарадорлигини аниқлашдан иборат.
Тадқиқотнинг вазифалари:
– дунёнинг саноати ривожланган мамлакатларида тиббиётнинг олий таълим ва ундан кейинги даврда устувор масофавий таълим усулларини аниқлаш;
– дипломгача ва дипломдан кейинги таълимда билимларни ошириш учун замонавий технологиялардан фойдаланиб масофадан ўқитишнинг янги усулларини ишлаб чиқиш ва татбиқ этиш, шунингдек, врачлар ва магистрларнинг масофадан ўқитишгача ва ўқишдан кейинги билимларини баҳолаш;
– Ўзбекистон Республикасида масофавий таълим усулларининг тиббий ёрдам сифатини ошириш, айниқса, врачларнинг ўз билимини ошириш омили сифатидаги аҳамиятини таҳлил қилиш;
– ўқитишнинг анъанавий ва масофадан ўқитиш усулларининг қиёсий таҳлилини амалга ошириш ва врачларнинг ёшига қараб янги билимларни ўзлаштириш қобилиятини аниқлаш;
– масофадан ўқитиш усуллари жорий этилишининг ижтимоий аҳамияти аниқлаш ва иқтисодий самарадорлигини ҳисоблаш.