Тошкент давлат юридик университети фуқаролик ҳУҚУҚИ дарслик II қисм

Оддий ширкатнинг фойдаси, ҳаражатлари ва зарарларини тақсимлаш. Фойда, ҳаражат ва зарарларни тақсимлаш тартиби шерикларнинг битимлари билан тартибга солинади, акс ҳолда шериклар ўзининг умумий ишга қўшган ҳиссаси қийматига мутаносиб равишда харажатлар ва зарарларни зиммасига олади. Бунда шериклардан бирортасини умумий харажатларни ёки зарарни қоплашда иштирок этишдан тўлиқ озод этадиган келишув ўз-ўзидан ҳақиқий бўлмайди.
Оддий ширкат шартномасини ўзгартириш ёки бекор қилиш. Оддий ширкат шартномасини ўзгартириш ЎзР ФК 28-боби тартибида амалга оширилади.
Оддий ширкат шартномаси бекор бўлишнинг асослари:

1. 
   шериклардан бирортаси муомалага лаёқатсиз, муомала лаёқати чекланган ёки бедарак йўқолган деб эълон қилинганда, агар оддий ширкат шартномасида ёки кейинги келишувда қолган шериклар ўртасидаги муносабатларда шартноманинг сақланиб қолиши назарда тутилмаган бўлса;
   
2. 
   шериклардан бирортаси ночор (банкрот) деб эълон қилинганда;
   
3. 
   шерик вафот этганда ёки оддий ширкат шартномасида иштирок этаётган юридик шахс тугатилганда ёхуд қайта ташкил этилганда, агар шартномада ёки кейинги келишувда қолган шериклар ўртасидаги муносабатларда шартноманинг сақланиб қолиши ёхуд вафот этган шерикнинг (тугатилган ёки қайта ташкил этилган юридик шахснинг) унинг меросхўрлари (ҳуқуқий ворислари) билан алмаштирилиши назарда тутилмаган бўлса;
   
4. 
   шериклардан бирортаси оддий ширкатнинг муддатсиз шартномасида бундан буён иштирок этишдан воз кечганда, ушбу модданингиккинчи хатбошисида кўрсатилгани бундан мустасно;
   
5. 
   муддат кўрсатилган ҳолда тузилган оддий ширкат шартномаси шериклардан бирининг талаби билан ўзи ва қолган шериклар ўртасидаги муносабатларда бекор қилинганда;
   
6. 
   оддий ширкат шартномасининг муддати ўтганда;
   
7. 
   шерикнинг улуши унинг кредитори талаби билан ажратилганда, ушбу модданинг иккинчи хатбошисида кўрсатилгани бундан мустасно;
   
8. 
   ФКда ёки шартномада назарда тутилган бошқа асосларда.
   

Оддий ширкат шартномасини бекор қилиш ҳолатида:
- шерикларнинг умумий эгалигига бериб қўйилган ашёлар тегишли шерикларга қайтарилади (хусусан, ушбу қоида якка тартибда белгиланадиган ашёга нисбатан қўлланилади).
- шериклар бажарилмаган умумий мажбуриятлар бўйича солидар жавобгар бўладилар.
Яширин ширкат. Шериклар оддий ширкат шартномасини унинг мавжудлигини учинчи шахсларга маълум қилмасдан имзолашлари мумкин. Бундай ҳолатда ҳар бир шерик ўз номидан ва шерикларнинг умумий манфаатлари йўлидаги барча битимлар бўйича ўзининг бутун мол-мулки билан жавобгар бўлади.