Тошкент давлат юридик институти

Биринчи ечим, икки ёки ундан ортиқ бажарувчилардан фақат биттаси тажовуз предметига нисбатан алоҳида ваколатларга эга, яъни мулк ишониб топширилган шахс бўлса, жиноятнинг объектив томонини бажаришда иштирок этган иккинчи шахс ташкилотчи, далолатчи ёки ёрдамчи сифатида жиноий жавобгарликка тортилади. Масалан, ўзлаштириш ва растрата субъекти ўзига ишониб топширилган мулкни хизмат мавқеидан фойдаланмаган ҳолда талон-торож қилганда, аммо махсус субъект саналмаган шахслар билан олдиндан келишиб иштирок этганда ва бошқа квалификация белгилари бўлмаса, ЖК 167-моддаси 1-қисми билан жавобгарликка тортилади. Бошқа иштирокчилар эса, бажарган вазифасига кўра, ЖКнинг 28-моддаси тегишли қисми орқали ЖК 167-моддаси 1-қисми билан жавобгарликка тортилади.
Иккинчи ҳолатда, махсус субъектлар икки ва ундан ортиқ иштирокчилар бўлиб, ишониб топширилган мулкни талон-торож қилиш тўғрисида олдиндан келишиб ҳаракат қилган бир гуруҳ шахсларни ташкил этса, бошқа шахслар эса махсус субъект белгиларига эга бўлмайди, бироқ талон-торож жиноятининг объектив томонини бажаришда бевосита қатнашади. Бу ҳолатда ўзлаштириш ва растрата жинояти субъектлари қилмиши бошқа квалификация қилувчи белгилар бўлмаса, ЖК 167-моддаси 2-қисм “в” банди билан (бир гуруҳ шахслар томонидан олдиндан тил бириктириб) билан, қолган иштирокчилар эса ЖК 28-моддаси тегишли қисми орқали ва 167-моддаси 2-қисм “в” банди билан (бир гуруҳ шахслар томонидан олдиндан тил бириктириб) квалификация қилинади.
Учинчи ҳолатга кўра, икки ёки ундан ортиқ бажарувчилардан фақат биттасигина мулк ишониб топширилган ёки унинг ихтиёрига берилган мансабдор шахс бўлиб, ўзлаштириш ёки растрата қилиш жиноятини мансаб мавқеини суиистеъмол қилиш йўли билан содир этади, бошқа шахслар эса махсус субъект белгиларига эга бўлмайди, бироқ талон-торожнинг объектив томонини бажаришда бевосита қатнашади. Бу ҳолатда ўзлаштириш ва растрата жинояти субъектлари қилмиши бошқа квалификация қилувчи белгилар бўлмаса, ЖК 167-моддаси 2-қисм “г” банди билан (мансаб мавқеини суиистеъмол қилиш йўли билан содир этилган бўлса), қолган иштирокчилар эса ташкилотчи, далолатчи ёки ёрдамчи сифатида ЖК 28-моддаси тегишли қисми орқали ва 167-моддаси 2-қисм “г” банди билан (мансаб мавқеини суиистеъмол қилиш йўли билан содир этилган бўлса) квалификация қилинади.