Тошкент Давлат техника

2.3. Двигателга техник хизмат кўрсатиш
турлари
Сменалараро техник хизмат кўрсатишда (иш сменаси бошлангунга қадар ва ундан сўнг) двигател чанг ва ифлосликлардан тозаланади; ташқи назорат орқали мой оқиши, ёнилғи, совутувчи суюқлик, узел ва деталларнинг ташқи маҳкамланиш ҳолати, мойнинг агрегат картеридаги, совутувчи суюқликнинг радиатордаги сатҳи текширилади ва керак бўлса, агрегатларга ушбу материаллар қуйилади; генератор тасмасининг таранглиги текширилади; ёнилғини майин тозалаш филтрининг филтрловчи элементи тозаланади.
1- техник хизмат кўрсатиш (ТХК-1) семеналар оралиғида тўлиқ ҳажимда бажарилади, ундан ташқари мойнинг сатҳи текширилади ва керак бўлса унинг сатҳи меъёр даражасигача етказилади, ҳаво тозалагичга техник хизмат кўрсатилади (СМД-60 двигатели учун).
2- техник хизмат кўрсатиш (ТХК-2) да ТХК-1 нинг барча операциялари бажарилади ва унга қўшимча илашиш муфтаси ажратиш подшипниги ва сиқиш ричаги орасидаги тирқиш текширилади ва керак бўлган ҳолларда у ростланади; юргизиб юбориш двигатели ва дизелнинг ҳаво тозалагичлари ювилади; ёнилғини дағал тазолаш филтридаги чўкмалар тўкилади; дизел картеридаги мой алмаштирилади; вал подшипниклари ва илашиш муфтасининг ажратиш механизми мойланади; центрафуга ротори чўкиндилардан тозаланади; турбокомпрессор филтри ювилади; юргизиб юбориш двигатели илашиш муфтаси клапанларидаги тирқиш текширилади ва керак бўлса у меъёр даражасигача ростланади; юргизиб юбориш двигатели редуктори юритмаси картерига мой қуйилади.
3- техник хизмат кўрсатиш (ТХК-3) да ТХК-2 нинг барча операциялари бажарилади ва тирсакли вал подшипниклари ва цилиндр поршен груҳининг техник ҳолатини аниқлаш мақсадида дизел диагностика қилинади; ёнилғини майин тозалаш филтрининг филтрловчи элементи алмаштирилади; ёнилғини бошланғич узатиш бурчаги ростланади, форсунка ва ёнилғи насоси текширилади ва керак бўлса ростланади; генератор якорининг равон ва эркин айланиши текширилади, магнето узгичлари ва юргизиб юбориш двигатели свечаси электродлари орасидаги тирқиш текширилади ва керак бўлса ростланади; дизелнинг сапуни ювилади; сув насоси ечиб олиниб, мойи ва керак бўлса унинг салниги ҳам алмаштирилади; дизелнинг қуввати ва ёнилғининг бир соатлик сарфи аниқланади; юргизиб юбориш двигателининг карбюратори ювилади, керак бўлган ҳолларда техник ҳолатини текшириш мақсадида стартёр ечиб олинади. Дизелнинг цилиндрлар каллаги ечиб олиниб, қурумдан тозаланади, клапанлар притирка қилинади, керак бўлса цилиндрлар каллаги қистирмаси алмаштирилади, картер таглиги ечиб олиниб ювилади ва мой сўргич тўри ҳам ювилади; мой йиққич ва мой насосининг маҳкамланиши текширилади.
Мавсумий техник хизмат кўрсатиш (МТК)да ТК-3 нинг барча операциялари бажарилади, улардан ташқари совутиш тизими ювилади ва антифриз билан тўлдирилади, дизел картеридаги мой навбатдаги мавсумга мос келувчисига алмаштирилади.