Тоифа Сертификат Методика билогия химия физика чет тили

Раис: Маъруза тугади, кимда қандай савол бўлса тадқиқотчига беришингизни сўрайман.
Савол: доц. Н.Орипов, - Истеъмолчи тушунчаси ва жамиятда истеъмолчи мақомининг ижтимоий-фалсафий мезонлари ҳақида диссертацияда қандай фикрлар келтирилган?
Жавоб: тадқиқотчи Т.Г.Ибайдуллаев: - Бугунги кунда жамият ҳаётида катта ўзгаришлар юз бермоқда. Бу, аввало, одамларнинг дунёқарашида, ҳаракати ва фаолиятида ва давлатга бўлган ишончида яққол кўринмоқда. Берилаётган имкониятлар, кенг кўламли қурилишлар, импорт ва экспорт ҳажмининг ортиши ва аҳоли истеъмол даражасининг яхшиланиб борилаётгани бунинг яна бир тасдиғидир.
Маълумки, ишлаб чиқариш жараёнининг мақсади ва моҳиятини товарлар ишлаб чиқариш орқали истеъмолчиларнинг эҳтиёжларини қондириш ташкил қилади. Истеъмолчи – ишлаб чиқарувчиларнинг фаолиятларининг асоси, ҳаракатларининг сабаби ҳисобланиб, истеъмолчиларнинг талаби асосида бу фаолият кенгаяди ва ҳаракатлар конкретлашади. Ишлаб чиқаришнинг талабга мувофиқ бўлмаслиги ҳаракатнинг бефойда ва мантиқсизлигини кўрсатади. Шундай экан, истеъмолчи шахс сифатида ҳам иқтисодий, ҳам ижтимоий соҳанинг марказий фигурасидир. Истеъмолчи сифатида ҳар бир соҳа жараёнида фаолият юритамиз, қатнашамиз ва ўз эҳтиёжимиз учун турли хил моддий ва манавий бойликлардан фойдаланамиз. Хўш истеъмолчи ким?У ўзида қандай хусусиятларни қамраб олган. “Истеъмолчи – табиий монополия субъекти ишлаб чиқараётган товарни олаётган жисмоний ёки юридик шахс”. Ёки “Истеъмолчиларнинг ҳуқуқларини ҳимоя қилиш тўғрисида”ги қонуннинг 1-моддасида ҳам истеъмолчи тушунчасига таъриф берилган бўлиб, унда белгиланганидек, “истеъмолчи – фойда чиқариб олиш билан боғлиқ бўлмаган ҳолда шахсий истеъмол ёки бошқа мақсадларда товар сотиб олувчи, иш, хизматга буюртма берувчи ёхуд шу ниятда бўлган фуқаро (жисмоний шахс)” сифатида кўрсатилган. Бу муносабатларни жамиятимизнинг ҳамма соҳаларида, кундалик шароитимизда кўрамиз, қатнашамиз ва ўз бирламчи ва иккиламчи эҳтиёжларимизни қондирамиз. Демак, умумий маънода “истеъмолчи – истеъмол қилувчи, ишлатувчи, фойдаланувчи; харидор”дир.