Тема: Анатомия панинин классификациясы рауажланыу тарийхы хам уйрениу методы

Tómengi jaq súyegi

Tómengi jaq súyegi (mandibula) taǵa formaǵa iye bolıp, denesi hám eki tarmaǵı bar. Denesiniń aldınǵı tárepinde iyek dóńligi rawajlanǵan, onıń eki tárepinde iyek tesikleri bolıp, olardan qan tamırları ótedi. Súyek denesiniń joqarı tárepinde alveola ósikleri jaylasqan. Jaqtıń denesinen joqarıǵa múyesh payda etip tarmaqlar shıǵadı. Múyeshlerdiń ishki, sırtqı tárepleri gedir-budır. Tómengi jaqtaǵı tarmaqlardıń ushı 2 ayrı buwın, hám ótkir ósik penen tamamlanadı.

Murın súyegi

Murın súyegi (os. nasale) kishkene tórt múyeshli plastinka túrindegi jup súyek bolıp, joqarıda mańlay súyeginiń murın bólimi menen, qaptal tárepte joqarǵı jaqtıń mańlay ósigi menen hám ekinshi tárepinen murın súyegi menen birigedi.

Pazna súyek

Pazna súyek (vomer) tórt múyeshlik túrindegi juqa súyek plastinkadan ibarat bolıp, aldınǵı sheti menen elek tárizli súyek tik plastinkasınıń tómengi shetine jantasıp turadı hám murın tosıǵı payda bolıwında qatnasadı. Bul súyektiń tómengi qırı erkin boladı. Arqa ótkir qırı murınnıń arqa tesiklerin xoanalardı bir- birinen ajıratıp turadı.

Bet súyegi

Bet súyegi (os. zygomatieum) natuwrı tórt múyeshlik túrindegi jup súyek. Onıń denesi ajıratıladı sonıń menen birge mańlay, joqarǵı jaq, sheke súyekleri menen birigetuǵın ósikleri boladı. Bul súyek joqarǵı jaqtıń sheti menen birlikte kóz kesasınıń tómengi shetin payda etedi. Onıń sırtqı diywalınıń payda bolıwında da qatnasadı.

Kóz jası súyegi

Kóz jası súyegi (os. lacrimale) gelleniń júz bólimindegi eń názik, kishkene tórt múyeshli súyek. Ol kóz jası kanalınıń ishki diywalı payda bolıwında qatnasadı.

Tańlay súyegi

Tańlay súyegi (os. palatinum) eki plastinkadan ibarat jup súyek. Olar bir- biri menen múyesh payda etip birigedi. Gorizontal plastinkası joqarǵı jaqtıń tańlay ósigi menen birge qattı tańlaydı payda etedi. Tik plastinkası joqarǵı jaq súyeginiń denesine jabısıp murın boslıǵı arqa bóliminiń qaptal diywalın payda etedi.