Тема: Анатомия панинин классификациясы рауажланыу тарийхы хам уйрениу методы

Júrek diywalınıń dúzilisi

Júrek kese jolaq bulshıq et talshıqlarınan dúzilgen ishi gewek organ esaplanadı. Júrek sırtqı tarepinen juqa perde menen qaplanǵan. Bul perde júrek qaltası perikard dep ataladı. Perikardtıń ózi de eki qabat bolıp, onıń bir qabatı tuwrıdan-tuwrı jureke jabısıp turadı hám epikard delinedi. Epikard perikardıń ekinshi qabatı menen júrek túbi aldında birlesedi. Perikardtıń ústingi hám astınǵı qabatları arasındaǵı boslıqta azmaz suyıqlıq bolıp, bul suyıqlıq júrek qısqarıwı
waqtında hár eki qabattıń bir-birine súykeliwinen saqlaydı. Sonıń menen birge epikard júrektiń artıqsha keńeyip ketiwine jol qoymaydı. Epikardtıń astında júrektiń ekinshi eń bekkem hám qalıń qabatı bulshıq et diywalı boladı, bul qabat miokard dep ataladı. Júrektiń bulshıq et qabatı hár tarepke qarap ketken kese jolaq bulshıq et talshıqlarınan dúzilgen.
Bólmeshe bulshıq etleri qarınsha bulshıq etlerinen ajıralǵan. Bólmeshe miokardı qarınsha miokardına qaraǵanda juqa hám qatlamları basqasha ornalasqan. Qarınshalardıń diywalları ádewir qalıń, ásirese shep qarınshanıń diywalı júdá qalıń bulshıq etlerden dúzilgen.

Júrektiń islewi

Júrek ritm menen qısqarıp bosasıp turadı, júrektiń qısqarıwı nátiyjesinde qan bólmeshelerden qarınshalarǵa hám olardan qan tamırlarǵa otedi. Júrektiń qısqarıp bosasıwı júrek tsikli delinedi. Júrek bólmesheleri menen qarınshaları qısqarıwı sistola, olardıń bosasıwı diastola delinedi. Úlken adamlarda júrek bir minuta 70-75 márte qısqaradı. Júrektiń qısqarıwınıń sanı turaqlı bolmay, kóp sebeplerdiń tásirinde ózgeredi. Hátteki kúnniń har qıylı mezgillerinde de júrektiń qısqarıw sanı ózgeshe boladı. Azanda saat 8-11 lerdiń arasında jurektiń qısqarıwı tezlesken boladı. 14:00 de bolsa qısqarıwı kemeyip, keshki saat 18:00-20:00 de jáne tezlesedi. Uyqı waqtında júrektiń qısqarıw sanı shama menen 20 % ke kemeyedi. Dógerek átiraptaǵı temperaturanıń joqarılawı, awqatlanıw, emotsional jaǵdaylar hám bulshıq et jumısı waqtında júrek urıwı tezlesedi.