Тема: Анатомия панинин классификациясы рауажланыу тарийхы хам уйрениу методы

Júrektiń qan tamırları

Júrek oń hám shep taj arteriyaları járdeminde arteriya qanın aladı.
Júrektiń taj arteriyası aortanıń yarımay tárizli klapanlarınıń tómenireginen baslanadı. Qarınsha sistolası dáwirinde yarımay klapan taj arteriyası tesigin bekitedi, sol sebepli qan júrektiń taj tamırlarına qarınshalar diastolası dáwirinde kiredi.
Júrektiń oń taj arteriyası aortadan shıǵıp júrektiń taj qarıǵında aorta menen oń bólme qoltıǵı arasınan ótedi. Bul arteriya taj qarıǵı boylap júrektiń oń shetin aylanadı.
Júrektiń shep taj arteriyası aortadan shıǵıp, júrektiń taj qarıǵında jatadı hám júrektin shep shetine baradı. Vena qanınıń tiykarǵı massası júrek diywallarındaǵı taj sinus sistemasına jıynaladı. Taj sinus júrektiń arqa tárepinde taj qarıqta, shep bólmeshe menen shep qarınsha arasında jatıp, oń bólmeshege ashıladı.
Júrektiń taj sinusına, júrektiń úlken, orta hám kishi venaları qan alıp keledi.

Tamırlar sisteması

Tamırlar sisteması arteriya, vena qan tamırları, limfa sistemasınan ibarat bolıp, denedegi organlardıń quramına kiredi. Tamırlar sisteması organizmdegi hámme strukturalar funktsiyasın birlestiriw múmkinshiligin beredi.

Kishi (ókpe) qan aylanıw sheńberiniń tarmaqları

Ókpe stvolı-ókpe arteriyası, júrektiń oń qarınshasınan ókpege venoz qandı alıp baratuǵın kelte, biraq juwan qan tamır. Ókpe stvolı IV-V kókirek omırtqaları tusında eki tarmaqqa bólinedi. Olardan biri oń ókpe arteriyası oń ókpege baǵdar
aladı hám ókpe dárwazasına kirerden aldın úsh tarmaqqa bólinedi hám ókpe bólimlerine bólek-bólek kirip tarqaladı.
Ókpe stvolınıń ekinshi tarmaǵı shep ókpe arteriyası, oń ókpe arteriyasınan azmaz kelte hám jińishkerek bolıp, shep ókpe oymasına baradı hám sol jerde arteriya eki tarmaqqa bólinip, har biri birewden ókpe bóleklerine kiredi.
Ókpeniń quramında arteriya qan tamırları bronx talaları menen birge baǵdarlanıp tarmaqlanadı hám ókpe alveolaların orap alǵan kapillyarlar bolıp tamamlanadı. Dem alıw qubılısında ókpe alveolaları arqalı hawa almasadı. Nátiyjede ókpe arteriyası boylap aǵıp keletuǵın venoz qan tazalanıp, kislorodqa bayıydı. Tazalanǵan qan vena kapillyarları boylap háreketlenip, hár bir ókpe dárwazasınan ekewden ókpe venası bolıp shıǵadı hám júrektiń shep bólmeshesine quyıladı.